Գորբաչովը խոստովանել է

ԽՍՀՄ-ի առաջին և վերջին նախագահ Միխայիլ Գորբաչովը խոստովանել է, որ իրեն պատասխանատու է զգում Խորհրդային միության փլուզման համար, քանի որ չի կարողացել բավարար չափով դիմակայել շրջապատին։ Ինչպես նշում է lenta.ru-ն, այս մասին նա պատմել է Մոսկայի էկոնոմիկայի դպրոցում իր գրքի շնորհանդեսի ժամանակ։ Հաստատության ուսանողների հետ շփման ընթացքում ԽՍՀՄ նախկին ղեկավարը պատմել է, որ ինքը 2-3 անգամ լքել է իր իսկ կողմից գլխավորած նոր միութենական համաձայնագրի մշակման հարցերով զբաղվող հանձնաժողովի նիստերը: «Ես գնում էի, իսկ որոշ ժամանակ անց գալիս էին մե՛կ Ելցինն ինչ-որ մեկի հետ, մե՛կ ուրիշ մեկը»,-պատմել է Գորբաչովը: Սակայն, միևնույն ժամանակ, նա վստահեցրել է, որ մշտապես դեմ է հանդես եկել ԽՍՀՄ-ն ինչ-որ այլ բանով փոխարինելու առաջարկներին` հավատարիմ մնալով այն համոզմունքին, որ պետությունը պետք է պահպանել: «Կարծում եմ, որ ես տեղի ունեցածի համար պատասխանատվություն եմ կրում: Չէ՞ որ ինձ ոչ ոք աշխատանքից չէր հեռացնում, ես ինքս հեռացա, քանի որ չէի կարողանում նրանց կառավարել»,-ասել է Գորբաչովը։