Մակունցը՝ ՍԴ նախագահի լիազորությունները դադարեցնելու մասին (video)
Սահմանադրական դատարանի դատավոր Հրայր Թովմասյանի լիազորությունները դադարեցնելու հարցով Սահմանադրական դատարան դիմելու մասին նախագծի շուրջ ԱԺ «Իմ քայլը» խմբակցությունում այլ դիրքորոշում չի ներկայացվել, ԱԺ-ում լրագրողների հետ ճեպազրույցում ասաց «Իմ քայլը» խմբակցության ղեկավար Լիլիթ Մակունցը:
«Հենց մենք ենք ներկայացրել նախագիծը և այդ առնչությամբ որևէ այլ դիրքորոշում պատգամավորների կողմից չի ներկայացվել», - ասաց Մակունցը:
Ինչպես ասաց` ՍԴ անդամներն իրենք պետք է դիտարկեն՝ մեր ներկայացրած փաստարկները հիմնավոր են, թե ոչ:
Հարցին, թե արդյոք խորհրդարանական այլ խմբակցությունները կսատարեն «Իմ քայլի» նախաձեռնությանը, Մակունցը նշեց.
«Ձայների այն քանակը, որը անհրաժեշտ է նախագիծը ներկայացնելու համար ՍԴ, «Իմ քայլը» խմբակցության ձայները բավարարում են: Բայց մենք շեշտադրում ենք արել, որ սա բացառապես «Իմ քայլը» խմբակցության հարցը չէ, և բոլոր խմբակցությունները պետք է շահագրգռված լինեն հարցի պատշաճ քննությունն իրականացնելու գործընթաց սկսել: Նախ, ուզում եմ ընդգծել, որ նախագծի հիմքում չկա որեւէ քաղաքական նախադասություն: Ամբողջությամբ հիմնված է իրավական փաստերի, հիմնավորումների վրա: «Լուսավոր Հայաստանն» արդեն հայտնել է իր աջակցությունը: Հույս ունեմ, որ ԲՀԿ-ն նույնպես կմիանա նախագծին, որովհետեւ իրականում այստեղ ոչ թե դատավորներից մեկի քննությունն է ԱԺ-ի կողմից, այլ ընդամենը դիմում ենք ՍԴ, որ նրանք դիտարկեն այդ հարցը», - ասաց նա:
Հետևեք մեզ Viber-ում
