17-ամյա Անուշը չգիտեր, որ զինվորական ամուսնուն վերջին անգամ է տեսնում. նրա ընտանիքը կարիք ունի առաջին անհրաժեշտության իրերի

13:10 - 22/ապրիլի/2016

Hetq.am. 17-ամյա Անուշ Օհանյանին հանդիպեցինք Չարենցավանում: Այստեղ է ապաստան գտել Թալիշից եկած Օհանյանների բազմազավակ ընտանիքը: Տղամարդիկ չկային, միայն երեք տղա երեխա, մնացածը՝ կանայք: Ընտանիքի հայրը` Վարուժանը, զինվորական է, Թալիշում է: Իսկ փեսան` Անուշի ամուսինը, նույն գումարտակում ծառայող ավագ լեյտենանտ 25-ամյա Հրաչ Գալստյանը, զոհվել է ապրիլյան պատերազմի ժամանակ:Անուշը տեսախցիկի առաջ մի քանի նախադասությունից ավելի չկարողացավ արտասանել: Տատիկը, թե`ախր Հրաչն ու Անուշն իրար շատ էին սիրում:Մեկ ամսից լույս աշխարհ կգա Անուշի ու Թալիշում զոհված ավագ լեյտենանտ Հրաչ Գալստյանի առաջնեկը: Աղջիկ է ծնվելու` Անահիտը. «Հրաչի հետ որոշել էինք, որ Անահիտ ենք դնելու անունը Հրաչի մոր պատվին»: Երկու օրից Անուշը կգնա Գյումրի` Հրաչենց տուն, կմնա այնտեղ, կծննդաբերի, կմեծացնի Հրաչի ու իր երեխային:Անուշը սովորում է Ստեփանակերտի պետական համալսարանի աշխարհագրության ֆակուլտետի առաջին կուրսում: Արդեն դիմել է, որպեսզի գործերը տեղափոխեն Գյումրի: Ապագայում նա դառնալու է աշխարհագրության ուսուցչուհի:Անուշը լուրջ հոգեբանական օգնության կարիք ունի, կորցրել է սիրելիին, վերքը թարմ է: Նրա ընտանիքը կարիք ունի առաջին անհրաժեշտության իրերի, միգուցե 30.000 դրամ վարձը կարող են բարի մարդիկ վճարել կամ առաջարկել անհատույց բնակարան: Նրանք հաշվեհամար չունեն 077 68 05 90 Անուշ Օհանյանի հեռախոսահամարն է: