Դեռ ամրապնդված չե՞ն հայ-ռուսական հարաբերությունները

Մոսկվա գնալը շատ ճիշտ էր ու արդյունավետ, մենք պետք է ամրապնդենք հարաբերությունները դաշնակից Ռուսաստանի հետ, երեկ լրագրողներին ասել է Հայաստանի վարչապետ Հովիկ Աբրահամյանը՝ պատասխանելով հարցին, թե արդյո՞ք անպատվաբեր չէր իր մասնակցությունը մեկ շաբաթ առաջ Մոսկվայում կայացած Եվրասիական տնտեսական միության վարչապետների նիստին: «Վարչապետը զգացմունքային որոշումներ չպիտի կայացնի և ուղղորդվի զգացմունքներով։ Մենք պիտի մտածենք մեր պետության շահերի մասին։ Գնալը շատ արդյունավետ էր, և մեր դաշնակցի հետ՝ Ռուսաստանի Դաշնության, մենք պետք է մեր հարաբերությունները ամրապնդենք», ասել է Հովիկ Աբրահամյանը։ Ի՞նչ է նշանակում` մենք պետք է ամրապնդենք հարաբերությունները դաշնակից Ռուսաստանի հետ... Մինչև հիմա ընդունված էր համարել, որ հայ-ռուսական հարաբերությունները ռազմավարական են: Հայաստանն էլ ի՞նչ պետք է աներ, որպեսզի Ռուսաստանին իր հավատարմությունն ապացուցեր: Հայաստանի իշխանությունները տապալեցին ԵՄ-ի հետ Ասոցացման համաձայնագիրը` անդամակցեցին ԵԱՏՄ-ին: Էլ չհիշեցնենք, որ Հայաստանը ՀԱՊԿ-ի ու ԱՊՀ-ի անդամ է: Այսինքն` դեռ հայ-ռուսական հարաբերություններն ամրապնդելու տեղ է մնացե՞լ... Դեռ նոր պե՞տք է ամրապնդենք, մինչև հիմա այդքան էլ ամուր չէին... Աբրահամյանի խոսքով` Ռուսաստանի վարչապետ Դմիտրի Մեդվեդևն է իրեն խնդրել մասնակցել մոսկովյան նիստին: «Ռուսաստանի Դաշնության կառավարության ղեկավարը, ով պաշտոնապես այցելեց Հայաստան, նաև հնչեցրեց և խնդրեց, որպեսզի մասնակցեմ։ Մենք քննարկել ենք։ Իհարկե՝ կարող էի չմասնակցել և նաև հաճոյանալ մեր ժողովրդի այն մասին, ովքեր որ ասում են՝ պետք չէ գնալ, պատիվ չի բերի։ Ես կարծում եմ՝ գնալը շատ ճիշտ էր, և պետք է մտածենք համագործակցության մասին մեր ռազմավարական դաշնակցի հետ», - ասաց վարչապետը: Աբրահամյանի` Մոսկվա մեկնելը ճիշտ էր: Երկրները, մանավանդ` գործընկեր երկրները չեն կարող իրենց թույլ տալ նեղանալ միմյանցից: Խնդիրը նրանում էր, որ եթե Աբրահամյանը գնում է Մոսկվա` Երևանի հավաքը Ալիևին հաճոյանալու նպատակով տապալելուց հետո` ի՞նչ հրապարակային քննադատություն հնչեցվեց Ալիևին պաշտպանող մեր գործընկերների հասցեին, կամ հենց` Ալիևի ռեժիմին: Սա է հարցը, որ Հայաստանի ղեկավարությունը Մոսկվայում պետք է Հայաստան շահը բարձրացներ` բարձր մակարդակով ու ամենախիստ տոնով: Չէ՞ որ Ռուսաստանի վարչապետ Դմիտրի Մեդվեդևի հետ հանդիպմանը երևանյան նիստի տապալումը քննադատեց նախագահ Սերժ Սարգսյանը՝ շեշտելով, որ հրաժարվելով մասնակցել Երևանում ծրագրված միջոցառմանը՝ գործընկերները վնաս հասցրեցին Եվրասիական միության հեղինակությանը: Այնուհետև, Երևանի փոխարեն Մոսկվայում հավաքվելու որոշումը քննադատեց նաև Հովիկ Աբրահամյանը: Այսինքն, մեկ շաբաթից ի վերջո չհրաժարվելը ու վարչապետների հանդիպմանն անձամբ ներկա գտնվելը պետք է ուղեկցվեր` պաշտոնական Երևանի կողմից գործողություններով` Մոսկվայում: Պետք է հայտարարվեր այն, ինչ ասվեց Երևանում Մեդվեդևի ներկայությամբ, և ավելի խիստ տոնայնությամբ: ԵԱՏՄ-ում` Ալիևի շահերը պաշտպանող մեր գործընկերների երեսին պետք է ասել այն, ինչ կա: Նրանք դա գիտեն, նորություն չէր, բայց պետք է լսեին նաև Մոսկվայում` ՀՀ իշխանության կողմից հրապարակային: Թամար Բագրատունի