Դոն Պիպոն իշխանությունների փրկօղակ
Համացանցում տեսանյութ է տարածվել, որտեղ երևում է, թե ինչպես են բերման ենթարկում «Դոն Պիպո» մականվամբ հայտնի Արթուր Ասատրյանին:
«Արթուր Ասատրյան» բարեգործական հիմնադրամի հոգաբարձուների խորհրդի նախագահ, բելգիահայ Արտակ Սերգոյանը ֆեյսբուքյան իր էջի ուղիղ եթերում նշել է, որ դեպքը տեղի է ունեցել մի քանի օր առաջ: «Արթուր Ասատրյանն անձամբ չի մեկնաբանել դեպքը և այդպիսի կոտրված ձեռքով այս պահին գտնվում է արտերկրում: Դեպքը տեղի է ունեցել Իջևանում, Իջևանի ոստիկանության պետի տեղակալն է նկարիչ-օպերատորը: Հրավիրել են ոստիկանություն, հետո շոու անելու համար դրսում կալանավորելու հրաման են տվել, որպեսզի նկարեն հեռախոսով: Ես վստահ եմ, որ բարձրագույն իշխանությունները, ոստիկանապետը տեղյակ չեն եղել այդ ամենից»,- ասել է նա և հույս հայտնել, որ կանցկացվի ծառայողական քննություն՝ պարզելու համար, թե ինչպես է տեսանյութը հայտնվել համացանցում, ովքեր են հեղինակները և ինչպես է այն հայտնվել Մանվել Գրիգորյանին սատարողների ձեռքում:
Ովքեր, որ չեն դիտել այդ տեսանյութը, հակիրճ ներկայացնենք, որ ոստիկանության երեք աշխատակից բարբարոսաբար հետ են ծալում Դոն Պիպոյի ձեռքերը ուշադրություն չդարձնելով նրա աղիողորմ ճիչերին, թե ինչ եք անում, ձեռքերս կոտրիք ու ստիպում են պառկել գետնին, կամ գոնե կքանստել: Երբ հասնում են իրենց ուզած պոզային նրան հանում են գետնից ու հրելով տանում ոստիկանության շենք: Մի խոսքով՝ զարհուրելի մի պատկեր, որը 21-րդ դարում կարող էր տեղի ունենալ միայն Հայաստանում ու դրանից հետո էլ բաց թողնեին այդ մարդուն: Նախկինում նման շոուներ հաճախ էին արվում, դրա անունը , իհարկե, ասֆալտին փռելու օպերացիա չէր, բայց այդպիսի թատրոնները նպատակ ունեին դարձնելու իշխանությունների փրկօղակ, երբ սոցիալական լարվածության պիկին լրահոս էին մղվում ու թեկուզ կարճաժամկետ մթնոլորտ լիցքաթափում: Ներկայում էլ իշխանությունը նման փրկօղակների կարիք ունի: Մի կողմից երկրորդ նախագահ Ռոբերտ Քոչարյանի անհիմն կալանավորումն է, մի բան պիտի արվի, որ մոռացության մատնվի նրա գործը, մի կողմից Ամուլսարի եռացող կրքերը, որը իշխանությունների մահկանացուն կարող են կնքել, մյուս կողմից դաշնակիցների հետ չկարգավորվող հարաբերություններն ու գազի գնի բարձրացման արդեն ռալ հեռանկարը: Իշխանությունները կանգնած են սոցիալական բումի առաջ ու ձմռանն ընդառաջ մեծ ալիքն անխուսափելի է լինելու, զրո աշխատատեղ, զրո ներդրում, արտագաղթի ու գործազրկության ցուցանիշներն են սահուն աճով մեծանում: Իսկ այս իրավիճակում իշխանություններին այլ բան չի մնում, քան նման թամաշաներով մեղմել հանրային դժգոհությունները, թե տեսեք-տեսեք պայքար ենք տանում հեղինակությունների դեմ, որ բոլորը Հայաստանում հավասար են ու արտոնյալների դաս այլեւս չունի: Հանրությունը կուշտ է այդ կտերից, որը տալիս են նախորդների ժամանակներից, ժամանակն է ռեալ կերակրել ժողովրդին:
Անի Սահակյան
Հետևեք մեզ Viber-ում
