Ինչպես եւ ինչու Արցախում ձախողեցին Քոչարյանի պաշտպանությունը
Օգստոսի 5-ին Ստեփանակերտում Նիկոլ Փաշինյանի հրավիրած հանրահավաքին մեր տեղեկություններով ՀՀ երկրորդ նախագահ Ռոբերտ Քոչարյանի զինակից ընկերները, շարքային արցախցիներ պատրաստվել են հանրահավաքն «ընդմիջել» Քոչարյանի մասին հիշեցմեմբ։ Պատրաստվել են պաստառներ, ելույթներ՝ ի պաշտպանություն գլխավոր հրամանատարի, Արցախի հերոսի, քանի որ յուրաքանչյուր արցախցի հասկանում է՝ ինչ է նշանակում փակի տակ պահել իրենց հայրենին ազատագրած հերոսին, նա լավ գիտե՝ ով ինչ է արել, Քոչարյանի անցած ուղին եղել է իրենց կյանքը եւ որոշել են իրականացնել «Վերադարձրեք մեր հերոսին» կարգախոսի ներքո մինի հավաք։ Սակայն Արցախի իրավապահները օպերատիվ տեղեկություն են ստացել այդ մասին եւ նախապես կանխել սպասվող միջոցառումը, ոմանց համոզել են, ոմանց հետ հարցերն այլ տարբերակով լուծել, ինչեւէ ամեն ինչ արել են այդ ամենը թույլ չտալու համար։
Մինչդեռ մենք տեսանք, թե ինչ ներկայացում բեմադրեց Սամվել Բաբայան- Արայիկ Հարությունյան դուետը: Նրանք նախապես հայտարարել էին հանրահավաքին իրենց աջակիցների ստվար զանգվածի մասնակցության մասին։ Մենք տեսանք, թե ինչպես Արցախի նախագահ Բակո Սահակյանի ելույթի ժամանակ կազմակերպված բեմադրություն եղավ ու պահանջեցին նախագահի հեռացումը։ Այդ թատրոնում իր գլխավոր դերն ուներ նաեւ ԱԱԾ պետ Արթուր Վանեցյանը, որն իջավ վանկարկողների մոտ ու փորձեց բացատրել, որ այսօր դրա տեղն ու ժամանակը չէ։ Չնայած ինքնին հասկանալի էր, որ այդ թատրոնի սցենարիստը Նիկոլ Փաշինյանն էր, նախապես կատարվել էր նաեւ դերաբաշխում ու բոլորին էր հայտնի՝ ով ինչ պետք է խոսի։
Նրանք էին նախապես կազմակերպել Բաբայանի ու Հարությունյանի մերձեցման հանդիպումը, այդ ամենը, բնականաբար, գործող վարչակարգի՝ Բակո Սահակյանի դեմ էր, ինչպես նաեւ Արցախի նախընտրական գործընթացները վերահսկելու։ Ինչը կնշանակի, որ հակառակ Նիկոլ Փաշինյանի հավաստիացումների, թե ինքը չի խառնվում ներքին կյանքին, իրականությունը այլ բանի մասին է խոսում։
Ինչեւէ, ուշագրավը այն է, թե ինչու Արցախի իրավապահները չեն իմացել, որ Բակո Սահակյանի դեմ նման բան է ծրագրվում, կամ իմացել են ու քայլեր չեն ձեռնարկել, մինչդեռ Ռոբերտ Քոչարյանի աջակիցների գործողությունները օրորոցում խեղդել են։
Կարող ենք ասել, որ Արցախի իշխանությունները կամ անգիտակցաբար քայլեր չեն ձեռնարկել, կամ էլ Հայաստանից նրանց նկատմամբ ճնշում է եղել եւ նրանց թույլ չեն տվել, քանի որ դա պետք էր Նիկոլ Փաշինյանին։
Անի Սահակյան
Հետևեք մեզ Viber-ում
