Վերջին շրջանում Թուրքիան միջազգային ասպարեզում գլխավորում է հակավարկանիշներն ու եզրափակում բոլոր դրական ցուցակները: Վառ օրինակներից մեկը մամուլի ազատության ինդեքսն է: «Լրագրողներ առանց սահմանների» կազմակերպությունը հրապարակել է 2016 թվականի Խոսքի ազատության համաշխարհային ինդեքսը: 180 երկրների ցանկում Թուրքիան 151-րդ տեղում է:
Մամուլի ազատության ինդեքսում Թուրքիան միեւնույն կատեգորիայում հայտնվել է այնպիսի երկրների հետ միասին, ինչպիսիք են Իրանը, Իրաքը, Ալժիրը, Նիգերիան, Եթովպիան: Վարկանիշի առաջին հորիզոնականներում սկանդինավյան երկրներն են՝ Ֆինլանդիան, Նորվեգիան եւ Դանիան:
Զեկույցի բաժնում Թուրքիայի մասին նշված է. «Նախագահ Էրդողանը Թուրքիայում լրատվամիջոցների դեմ հարձակում է սկսել. լրագրողներն ու սոցիալական մեդիայի օգտատերերը դատարան են կանչվում՝ «նախագահի վիրավորանք հասցնելու հիմքով»; համացանցը կանոնավոր կերպով գրաքննության է ենթարկվում; մամուլն ու քաղաքացիական հասարակությունը, չնայած ճնշումներին, դիմադրում է Էրդողանի բռնակալական դիրքորոշմանը»: Այս մասին գրում է թուրքական Yeni Mesaj-ը:
Վերջին 10 օրերին ԱՄՆ-ից եւ Եվրամիությունից նույնպես Թուրքիայի հասցեին լուրջ նախազգուշացումներ են հնչել: Մասնավորապես, ԵՄ-ին անդամակցության ճանապարհին Թուրքիայի առաջընթացի մասին զեկույցում նշված է. «Թուրքիան պետք է իսկապես դիմակայի լրագրողներին նկատմամբ ճնշումների ցանկացած ձեւերի, հետաքննի լրատվամիջոցների աշխատակիցների դեմ հարձակումներն ու սպառնալիքները, ակտիվորեն կանխի մամուլի դեմ հարձակումները»: Մարդու իրավունքների մասին ԱՄՆ Պետքարտուղարության՝ 2015 թվականի զեկույցում նույնպես Թուրքիան քննադատության է ենթարկվում:
Ըստ Inosmi-ի, այս զեկույցներում նշվում է, որ կառավարության կողմից լրատվամիջոցների վերահսկողության կամ ճնշումների մեթոդներից մեկը տնտեսական մտրակն է: Ընդդիմադիր թերթերն ու հեռուստաալիքները բախվում են տնտեսական լուրջ ճնշման, հիմնականում՝ հարկերի եւ տուգանքների:
Yeni Mesaj. Թուրքիան ձախողեց
Հետևեք մեզ Viber-ում
