Շոյգուի նոր ակնարկը հայկական կողմին

Օգոստոսի 17-ին Մոսկվայում տեղի է ունեցել ՀՀ պաշտպանության նախարար Դավիթ Տոնոյանի հանդիպումն իր գործընկերոջ, ՌԴ պաշտպանության նախարար, բանակի գեներալ Սերգեյ Շոյգուի հետ, այս մասին տեղեկացրել է ՊՆ մամուլի քարտուղար Արծրուն Հովհաննիսյանը։

Հանդիպման ընթացքում քննարկվել են երկկողմ ռազմական և ռազմատեխնիկական համագործակցությանն առնչվող հարցեր։ Գոհունակություն հայտնելով հարաբերությունների ներկայիս մակարդակի վերաբերյալ և ընդգծելով դրանց ռազմավարական դաշնակցային բնույթը, պաշտպանության նախարարները կարևորել են համատեղ մարտական պատրաստության, օպերատիվ պլանավորման, ռազմական կրթության, ՌԴ 102-րդ ռազմակայանի մարտունակության ամրապնդման և մի շարք այլ ոլորտներում համագործակցության հետևողական զարգացումը։
Քննարկվել են տարածաշրջանային և միջազգային անվտանգության հարցեր։ Ասվում է, որ Դավիթ Տոնոյանը և Սերգեյ Շոյգուն մի շարք կարևոր պայմանավորվածություններ են ձեռք բերել երկկողմ ռազմաքաղաքական, ռազմական և ռազմատեխնիկական ծրագրերի իրականացման շուրջ։

Ուշագրավը այստեղ, սակայն, ռուսական կողմի արձանագրումն է՝ Սիրիայի հարցում ռուսական կողմին աջակցելու առումով:

Ռուսաստանի պաշտպանության նախարար Սերգեյ Շոյգուն Հայաստանի իր պաշտոնակից Դավիդ Տոնոյանի հետ հանդիպմանը ընդգծել է Սիրիայում Հայաստանի ականազերծողների և բժիշկների ցուցաբերած հումանիտար օգնության մեծ նշանակությունը: Ըստ ռուսական պետական ՏԱՍՍ գործակալության՝ Շոյգուն առաջարկել է մտքեր փոխանակել ոչ միայն ռազմական և ռազմատեխնիկական երկկողմ ծրագրերի շուրջ, այլ նաև անդրադառնալ Սիրիային ցուցաբերվող մարդասիրական համատեղ օգնությանը: Ռուսաստանի պաշտպանության նախարարը նշել է, որ հազարավոր մարդիկ բժշկական օգնություն են ստացել, Հայաստանի վիրաբույժները մի քանի հարյուր վիրահատություն են կատարել: «Դա շատ մեծ աշխատանք է, որը չի կարելի չնկատել և անտարակույս իր ներդրումն ունի այդ տարածաշրջանում իրավիճակի նորմալացմանը»,- Դավիթ Տոնոյանի հետ հանդիպմանը ասել է Սերգեյ Շոյգուն: Նա նաև նշել է, որ Ռուսաստանի և Հայաստանի ռազմական գերատեսչությունների միջև հարաբերությունների ռազմավարական մակարդակը թույլ է տալիս հուսալու, որ դեռ շատ բան կարվի:

Ըստ ամենայնի՝ ռուսական կողմի հետ հայկական կողմը կանխազգում է մոտալուտ պատերազմի բռնկման վտանգը, և ռուսական կողմի հետ քննարկումները ռուսական զինտեխնիկայի ձեռքբերման շուրջ, արագացնում է, որպեսզի նոր մատակարարումներ լինեն:

Մյուս կողմից ստացվեց մեկ այլ ուշագրավ տեղեկություն: Պաշտպանության նախարարի մամուլի խոսնակ Արծրուն Հովհաննիսյանը հաստատել է տեղեկությունն այն մասին, որ հայկական զինուժը բարելավել է իր դիրքերը Տավուշի մարզում` Ադրբեջանի հետ սահմանագծում: «Բերեք ես հստակ թվեր, հեկտարներ չասեմ, ես հայտարարություն արել եմ հենց նույն օրը, որ եթե մենք Ադրբեջանի նման աղմուկ չենք բարձրացնում, դա չի նշանակում, որ մենք չենք իրականացնում դիրքերի բարելավում: Դա մշտական գործընթաց է եղել տարբեր հատվածներում, այդ թվում՝ անցած տարի, որ այսպես ասած, «սև փիառով» մեզ նախիջևանյան ուղղությամբ փորձեցին էսպես բաներ ներկայացնել, մենք էնտեղ էլ ենք դիրքեր բարելավում, դա զինված ուժերի մշտական աշխատանքն է», ասել է Արծրուն Հովհաննիսյանը:

Իսկ օգոստոսի 11-17-ն ընկած ժամանակահատվածում արցախա-ադրբեջանական հակամարտ զորքերի շփման գոտում հակառակորդը հրադադարի պահպանման ռեժիմը խախտել է ավելի քան 120 անգամ, որի ընթացքում, տարբեր տրամաչափի հրաձգային զինատեսակներից, հայ դիրքապահների ուղղությամբ արձակել է շուրջ 2300 կրակոց, տեղեկացնում են ԱՀ ՊՆ լրատվական ծառայությունից: «ՊԲ առաջապահ զորամասերը շարունակում են առաջնագծում հանդես գալ թելադրողի դիրքից և անհրաժեշտ քայլեր ձեռնարկում մարտական դիրքերի պահպանությունը հուսալիորեն կազմակերպելու համար», -նշվում է Արցախի ՊՆ հաղորդագրության մեջ:

Ընդհանուր առմամբ, կա որոշակի լարվածություն սահմաններին, միաժամանակ՝ Ադրբեջանից հնչող քննադատությունների ֆոնին հայկական կողմը ցույց է տալիս, որ ռուսական կողմի հետ արդյունավետ աշխատում է՝ թե՛ ռազմական ոլորտում, թե՛ Սիրիայում համագործակցության առումով:

Թամար Բագրատունի