Միայն մրցումներից հետո իմացա, որ ամուսինս առաջնագծում է.Նազիկ Ավդալյան

«Վնասվածքից հետո վերադարձը շատ դժվար էր,- Հայելի ակումբում  լրագրողների հետ հանդիպմանը խոստովանեց Եվրոպայի  չեմպիոն Նազիկ Ավդալյանը և շարունակեց.«Երիտասարդ տարիքում ոչ  մի խնդիր, ոչ մի հոգս չունեի ու միայն պարապմունքի մասին էի մտածում:Հիմա իրավիճակն այլ է. կարոտում էի երեխայիս, ամուսնուս: Շատ դժվար էր: Գիտեի, որ ծանր է լինելու, բայց որ այդ աստիճան, չէի պատկերացնում: Փառք Աստծո, հիմա ամեն ինչ լավ է ընթանում: Չեմ համարում, որ ավարտել եմ իմ ուղին ծանրամարտում: Դեռ ճանապարհ ունեմ անցնելու»: Սահմանին կանգնած ամուսնու մասին Նազիկ Ավդալյանը պատմեց.«Գիտեի, որ ամուսինս մեկնել է՝ կանգնելու հայ զինվորների կողքին, բայց ասում էր, որ իրեն սահման չեն տարել: Միայն մրցումներից հետո իմացա, որ առաջնագծում է: Ճիշտ է՝ դա ինձ համար անսպասելի նորությունն էր, բայց եթե իր կողքին լինեի, հաստատ նրան հետ չէի պահի այդ քայլից: Այս պահի դրությամբ ես ու Հռիփսիմեն պետք է Հայաստանը ներկայացնենք Օլիմպիական խաղերում: Տա Աստված՝ ոչ մի վնասվածք չունենանք: Մենք արդեն մայրեր ենք: Եվ երբ իրար հետ խոսում ենք մեր զավակների մասին, եզրակացությունը միշտ մեկն է. նրանք և ուժ են տալիս և կոտրում մեզ»,- նշեց Ավդալյանը: