«Պետությունը չի ապահովում Ռոբերտ Քոչարյանի գործի բնականոն ընթացքը». Արամ Օրբելյան

ՀՀ երկրորդ նախագահ Ռոբերտ Քոչարյանի շահերի պաշտպան Արամ Օրբելյանի խոսքով՝ Ռ. Քոչարյանի գործում որևէ զարգացում չկա, քանի որ դատական համակարգը տվյալ գործը չի քննում։

Հայելի ակումբում հրավիրված ասուլիսի ժամանակ Արամ Օրբելյանն ասաց, որ ունեն մի իրավիճակ, երբ Ռոբերտ Քոչարյանը գտնվում է անազատության մեջ, իսկ գործընթացը չի վերահսկվում որևէ դատարանի կողմից, չկա որևէ դատարան, որը կարող է ազատելու կամ չազատելու, այլընտրանքային խափանման միջոց ընտրելու վերաբերյալ որևէ որոշում ընդունել։

«Մենք վերաքննիչ դատարանի որոշումից հետո հայտնվել ենք մի վիճակում, երբ գործը նոր է ուղարկված դատարան, այսինքն, երբ դատարանը 15-օրյա ժամկետում պարտավոր է որոշում ընդունել, օրինակ՝ գործը կարճելու, կասեցնելու և այլ որոշումներից որևէ մեկը, մենք մինչև հիմա այդ որոշումը չունենք։

Դավիթ Գրիգորյանը կայացրել էր որոշում, որը բեկանվել էր, վերաքննիչ դատարանը պահանջել էր, որպեսզի առաջին ատյանի դատարանը գործը շարունակեր կասեցման պահից, և արդեն 1,5 ամիս է՝ որևէ զարգացում կամ գործընթաց տեղի չի ունենում։ Այս ամենն ակնհայտորեն մարդու իրավունքների խախտում է։

Անձը չի կարող գտնվել անազատության մեջ անորոշ ժամկետով՝ առանց որևէ դատական վերահսկողության հնարավորության»,- փաստեց Արամ Օրբելյանը։

Արամ Օրբելյանն արձանագրեց, որ այստեղ մեղավորը պետությունն է, որը չի ապահովում գործի բնակակոն ընթացքը։