Հեղափոխություն տեղի է ունեցել համայն հայության մեջ. Փաշինյանի ելույթը Արցախում

Համահայկական հեղափոխություն նշանակում է, որ այն տեղի է ունեցել ոչ միայն ՀՀ-ում, այլ համայն հայության շրջանում, համայն հայության մեջ: Այս մասին Ստեփանակերտի Վերածննդի հրապարակում ելույթի ժամանակ ասել է Հայաստանի վարչապետ Նիկոլ Փաշինյանը:

«Սա էլ իր հերթին նշանակում է, որ հեղափոխության արժեքները համահայկական արժեքներ են և այդ արժեքների ինստիտուցիոնալ արմատավորումը մեզ կրկին դնելու է աշխարհի առաջատար ժողովուրդների շարքում: Սա էլ նշանակում է, որ հեղափոխությունը տեղի է ունեցել, բայց չի ավարտվել, որովհետեւ արժեքների հաստատումը, ամրագրումը տևական քաղաքական պրոցես է, որը պիտի շարունակվի Հայաստանում, Արցախում և Սփյուռքում:

Ըստ այդմ՝ համահայկական հեղափոխության ամենաառանցքային արդյունքը պետք է լինի, որ մեր իրականության մեջ գերիշխած հատվածականությունը պետք է փոխարինվի համահայկականությամբ:

Մենք պետք է հրաժարվենք այն մտածելակերպից, երբ իրար բաժանում ենք ղարաբաղցիների, իջևանցիների գյումրեցիների, սփյուռքահայերի: Սա չի նշանակում, սակայն, որ պետք է հրաժարվենք մեր ծննդավայրից:

Համահայկականության հաջորդ դրսևորումը պետք է լինի ուժերի մեկտեղումն ընդհանուր նպատակների իրականացման համար: Դա էլ Հայաստանի և Արցախի զարգացումն ու հզորացումն է տնտեսական, անվտանգային, աշխարհքաղաքական առումներով», ասել է Նիկոլ Փաշինյանը: