Լիլիթ Հովհաննիսյանը բաց նամակով դիմել է ՄԱԿ-ի Քաղաքակրթությունների դաշինքին

Երգչուհի Լիլիթ Հովհաննիյանը ևս միացել է հայ մշակութային գործիչների` միջազգային կազմակերպություններին ուղղված բաց-նամակների նախաձեռնությանը: Նրա դիմումն ուղղված է ՄԱԿ-ի Քաղաքակրթությունների դաշինքին և Մարդու իրավունքների գրասենյակին: Երգչուհու գրառման մեջ ասվում է. «ՄԱԿ-ի Քաղաքակրթությունների դաշինքի և Մարդու իրավունքների գրասենյակի հարգարժան անդամներ, Իմ անունը Լիլիթ է: Ես հայ եմ: Ապրիլի 25-27-ն ընկած ժամանակահատվածում ՄԱԿ-ի Քաղաքակրթությունների դաշինքի 7-րդ գլոբալ ֆորումն անցկացվելու է Ադրբեջանի մայրաքաղաք Բաքվում` մի երկրում, որի ղեկավարի ելույթներում այնքան ատելություն, թշնամանք և անհանդուրժողականություն կա դեպի իր հարևան պետությունը: Ադրբեջանի և ադրբեջանցիների գերակայությունն ու բռնի ուժով հայերի ու Հայաստանի ոչնչացումը մի ընդհանուր գաղափար է, որով լցված են այդ ազգի ներկայացուցիչների սրտերն ու հոգիները: Ի՞նչ է սա, եթե ոչ ռասիզմի դրսևորում: Ծեր մարդկանց մարմինների խեղաթյուրումը, հայ զինվորների գլխատումը… Ադրբեջանական բանակի այսօրինակ գործողությունները, ասես, ոգեշնչված լինեն «Իսլամական պետություն»-ից: Նույնիսկ այն բանից հետո, երբ Ադրբեջանը հրադադարի կոչ է արել, նրա հրետանավորները շարունակում են ռմբակոծել Լեռնային Ղարաբաղի հանրապետությունը` ոչնչացնելով դպրոցներ և գյուղեր, սպանելով դպրոցականներին և ծերերին: Ադրբեջանի գործողությունները պատերազմական հանցագործություններ են, որոնք պետք է դատապարտվեն` այդ երկրի ահաբեկչական գործողությունների, ագրեսիաների և ռասիզմի դեմ պատժամիջոցների կիրառմամբ: Հարգանքներով` Լիլիթ Հովհաննիսյան` երգչուհի»: