Վահե Գրիգորյանին ու նրան դուխ տվողներին երևի ասել են՝ դանդաղ շտապեք

Սահմանադրական դատարանի նորընտիր դատավոր Վահե Գրիգորյանը հունիսի 20-ին՝ ՍԴ դատավոր ընտրվելուց հետո, իր երդման ընթացքում հայտարարեց, որ ստանձնում է ոչ թե ՍԴ դատավորի, այլ ՍԴ նախագահի լիազորությունները: Ըստ Վահե Գրիգորյանի՝ ՍԴ-ն ունի երկու դատավոր, որոնցից մեկը ինքն է, մյուսը երկրում չէ, ուստի հենց ինքն էլ դառնում է ՍԴ նախագահի լիազորությունների կատարողը: Վահե Գրիգորյանի այս հայտարարությունն աննախադեպ էր ու չլսված ոչ միայն իրավաբանությունից հեռու շարքային ՀՀ քաղաքացու, այլ, ինչպես ցույց տվեցին մասնագետների հնչեցրած գնահատականները, նաև պրոֆեսիոնալ իրավաբանների համար:
Այն, որ ՀՀ նոր իշխանությունները հեղափոխությունից հետո խնդիր են դրել վերցնել իշխանության բոլոր ճյուղերը և հատկապես դատական համակարգն ու Սահմանադրական դատարանը, առավել քան ակնհայտ է: Բայց այն, որ կարելի էր ՍԴ դատավոր ընտրվելով միանգամից ԱԺ ամբիոնից ինքնահռչակվել ՍԴ նախագահ, աներևակայելի էր անգամ հեղափոխական իրավիճակի համար, քանզի նման նախադեպ աշխարհի որևէ երկրի դատական համակարգի պատմությունից թերևս հնարավոր չէ հիշատակել: Կարելի է տարբեր կերպ վերաբերվել ՍԴ գործող նախագահին և ՍԴ մնացած անդամներին, կարելի է ընդունել կամ չընդունել նրանց մասնագիտական գործունեությունը, կարելի է քննադատել գործող Սահմանադրությունը՝ որպես երկրի մայր օրենք, բայց այդ օրենքի տառն ու բառը սրբորեն պահելը ՀՀ յուրաքանչյուր քաղաքացու, առավել ևս ՍԴ դատավորի սուրբ պարտականությունն է: Նախ սկսենք նրանից, որ ՍԴ որևէ դատավոր իրավասու չէ ինքնուրույն մեկնաբանել Սահմանադրության այս կամ այն նորմը, քանի որ ՍԴ-ն կոլեգիալ մարմին է, ուստի նման մեկնաբանություն անելու համար պետք է առնվազն ՍԴ նիստ հրավիրվեր: Վահե Գրիգորյանի քայլն ուղղակի ինքնիրավչություն էր, Սահմանադրության կոպիտ խախտում, ինչի մասին են վկայում տարբեր մասնագետների արած հայտարարությունները: Ի վերջո կան միջազգային նորմեր, պրակտիկա, օրենք, Վենետիկ հանձնախումբ:
Հայաստանի հեղափոխական իշխանությունները, որ առաջին պահին հանրային խրախճանք էին սկսել, մեկ օր անց սկսեցին լղոզել իրավիճակը, թե Վահե Գրիգորյանն ինքն իրեն ՍԴ նախագահ չի նշանակել, նա այլ բան է ասել:
Ինքը՝ Սահմանադրական դատարանի նորընտիր անդամ Վահե Գրիգորյանը ևս ԱԺ ամբիոնի մոտ ունեցած դուխով ելույթից հետո, այնուամենայնիվ, հանդիպումներ է ունեցել ՍԴ որոշ անդամների և ՍԴ նախագահ Հրայր Թովմասյանի հետ:
«Հանդիպումներ եմ ունեցել և՛ երեկ, և՛ այսօր ՍԴ անդամների մի մասի և ՍԴ նախագահ Հրայր Թովմասյանի հետ: Ինձ թվում է՝ կառուցողական էին Թովմասյանի հետ հանդիպումները»,- լրագրողների հետ զրույցում ասել է Գրիգորյանը:
Պարզվում է՝ Ազգային ժողովում Սահմանադրական դատարանի նախագահի լիազորություններն ու պարտականությունները ստանձնելու մասին արված իր հայտարարությունը Վահե Գրիգորյանն այժմ գործընկերների հետ առանձին զրույցների ընթացքում է քննարկում:
Վահե Գրիգորյանը նաև նշել է, որ ստեղծված հնարավոր ճգնաժամային իրավիճակը լուծելու իրավական ճանապարահ կա, սակայն մանրամասնել կամ այլ մեկնաբանության տալ հրաժարվել է։
Մեկնաբանելն իհարկե հեշտ չէ այն պարզ պատճառով, որ ՍԴ դատավոր Վահե Գրգորյանը միտումնավոր կամ թյուրիմացաբար խախտել է ՀՀ Սահմանադրությունը՝ միայնակ մեկնաբանելով սահմանադրական նորմը, ինչի իրավունքը, կրկնում ենք, վերապահված է ավելի քան մեկ տասնյակ անդամ ունեցող Սահմանադրական դատարանին: Հավանաբար, Վահե Գրիգորյանին և նրան դուխ տվողներին հասկացրել են, որ պետք է մի քիչ դանդաղ շտապել, որովհետև սահմանադրական նորմի խախտումը վաղեմության ժամկետ չունեցող մեղադրանք է:

Հայկ Դավթյան