Թրամփի արցախյան ակնարկն Ալիևին. Ինչ է մտածում Փաշինյանը

Միացյալ Նահանգների նախագահը շնորհավորել է Ադրբեջանի նախագահին ու ժողովրդին առաջին հանրապետության հիմնադրման 101-րդ տարեդարձի կապակցությամբ:

«Մեր երկրները ամուր համագործակցություն և մի շարք ընդհանուր հետաքրքրություններ ունեն: Ես գնահատում եմ Ադրբեջանի ներդրումը միջազգային անվտանգության ապահովման գործում և Ձեր առաջնորդությունը` Եվրոպայի էներգետիկ անվտանգությունն ապահովելու հարցում` «Հարավային գազային միջանցք» ծրագրի միջոցով», - ըստ պաշտոնական հաղորդագրության, Իլհամ Ալիևին գրել է Դոնալդ Թրամփը: Շնորհավորական ուղերձում Սպիտակ տան ղեկավարը հիշատակել է նաև ղարաբաղյան խնդիրն ու ողջունել Մինսկի խմբի շրջանակներում հակամարտության խաղաղ կարգավորմանը հասնելու ջանքերը:

Նկատենք, որ Թրամփը հանրապետության հռչակման տարեդարձի կապակցությամբ ուղերձ է հղել նաեւ Վրաստանի վարչապետին: Վրաստանի դեպքում ԱՄՆ նախագահը վերահաստատել է այդ երկրի ինքնիշխանությանը եւ տարածքային ամբողջականությանն անվերապահ աջակցությունը եւ հավաստիացրել, որ Միացյալ Նահանգները մշտապես հետեւելու է այդ ուղեգծին:

Մինչդեռ Ադրբեջանի պարագայում՝ Թրամփը նշել է այդ երկրի` Եվրոպայի էներգետիկ անվտանգությանն ուղղված «Հարավային գազային միջանցք» նախագծի կարեւորությունը եւ Իլհամ Ալիեւի մասնակցությունը ԵԱՀԿ Մինսկի խմբի շրջանակներում բանակցություններին` ԼՂ հակամարտության խաղաղ կարգավորման նպատակով:
ԱՄՆ-ն ցույց է տալիս, որ Ադրբեջանը ԱՄՆ-ի համար արժանի է հետաքրքրության՝ էներգետիկ ոլորտում ունեցած դերի առումով: Իսկ ահա Վրաստանի դեպքում, այսպես ասած՝ մշտապես հիշատակվում է Ռուսաստանի կողմից Վրաստանի տարածքների նկատմամբ ագրեսիայի գործոնն ու շեշտվում է Վրաստանի տարածքային ամբողջականության պահը:

Իհարկե, Միացյալ Նահանգները լինելով ԵԱՀԿ Մինսկի խմբի անդամ՝ չի կարող ընդգծված պաշտոնական հայտարարությունում շեշտել Ադրբեջանի տարածքային ամբողջականությունը հարգելու հանգամանքը, սակայն փաստ է, որ այդ քաղաքականությունը նպաստավոր է հայկական կողմերի համար:
Այստեղ է, որ առաջ է գալիս Արցախի միջազգային ճանաչման հարցը, որպես ինքնուրույն գործոն աշխարհին ներկայացնելու անհրաժեշտությունը:

Հայաստանի կառավարությունը արտաքին քաղաքականություն իրականացնելիս՝ պետք է օգտվի հնարավորություններից, որոնք ընձեռում է միջազգային հանրությունը: Բայց, կարծես, առայժմ ամեն ինչ դրված է ինքնահոսի վիճակի...

Մետաքսյա Շալունց