Ալիևը սպասում է Պուտինի կողմից ճնշման
Օրերս Հայաստանի վարչապետ Նիկոլ Փաշինյանը հայտարարել է, որ անհրաժեշտ չի համարում շտապեցնել Ղարաբաղյան հակամարտության կարգավորման բանակցային գործընթացը, հայտնում էին ռուսաստանյան լրատվամիջոցները:
«Մենք չենք շտապեցնելու այդ գործընթացը, բայց չենք էլ դանդաղեցնելու, քանի որ հակամարտությունը կա, և ես չեմ կարծում, որ այն մոռացության է մատնված», - ասել է Փաշինյանը ռուսաստանցի լրագրողների հետ զրույցում: Նա նաև ընդգծել է, որ Հայաստանի կողմից Ղարաբաղի անկախության ճանաչման հարցը զգայուն է: Նա նշել է՝ Ղարաբաղյան հարցը կարող է լուծվել, բայց դրա համար անհրաժեշտ է, որ Լեռնային Ղարաբաղը վերադառնա բանակցային գործընթաց:
Իր հերթին Ադրբեջանի նախագահ Իլհամ Ալիևն էլ Բաքվում իսլամական երկրների դեսպանների հետ հանդիպման ժամանակ կոչ է արել խստացնել ճնշումը Հայաստանի վրա՝ «ղարաբաղյան հակամարտությունը լուծելու և գրավված ադրբեջանական տարածքները ազատելու համար»։
ИА REGNUM-ի փոխանցմամբ՝ Ալիևն ասել է, թե «Ամբողջ աշխարհը ճանաչում է Լեռնային Ղարաբաղը և շուրջը գտնվող 7 շրջանները, որպես ադրբեջանական տարածքներ: Սակայն օկուպանտի վրա (նկատի ունի Հայաստանը) չի իրականացվում համապատասխան ճնշում` օկուպացված ադրբեջանական տարածքների ազատագրման ուղղությամբ: Հակամարտությունը կարող է լուծվել միայն Ադրբեջանի տարածքային ամբողջականության շրջանակներում», իսլամական երկրների դեսպանների հետ հանդիպման ժամանակ նշել է Ալիևը:
Ալիևն, այսպիսով, անցնում է ընդդեմ Հայաստանի ճնշումների կոնկրետ քաղաքականության: Սա վկայում է այն մասին, որ նա հանդիպումների ռեժիմում Փաշինյանից առանձնապես սպասելիքներ չունի:
Հիմա կարևոր է, թե հայկական կողմն առաջիկա հանդիպումներում ինչ բազայով է գնում: Մի կողմից Ադրբեջանն ակնարկում է, որ կոնկրետ փաստաթուղթ են քննարկվում, մյուս կողմից՝ նշում է, որ պետք է ճնշել Հայաստանին:
Ո՞վ կարող է ճնշել: Իհարկե, Ռուսաստանը, որի ղեկավարի հետ Փաշինյանն այդքան ջանում է բարեկամանական հարաբերություններ հաստատել:
Դատելով պաշտոնական Մոսկվայից հնչող հայտարարություններին՝ ռուսական կողմը «ձեռքը զարկերակի վրա» է պահում և ակտիվություն է ցուցաբերում ղարաբաղյան կարգավորման գործընթացի առնչությամբ:
Բայց արդյոք Պուտինի կգնա ավելիի՞ն և ընդհանրապես՝ ցանկանո՞ւմ է հրատապ արցախյան լուծում տեսնել մոտ ապագայում...
Թամար Բագրատունի
Հետևեք մեզ Viber-ում
