Ինչ կորոշեն Մոսկվան ու Վաշինգտոնը մի քանի օրից՝ Արցախի հարցում

Մայիսի 14-ին Միացյալ Նահանգների պետքարտուղար Մայք Փոմփեոն կժամանի Սոչի` բանակցություններ անցկացնելու իր ռուսաստանցի պաշտոնակից Սերգեյ Լավրովի հետ:
Ռուսաստանյան «Նովոստի» լրատվական գործակալության փոխանցմամբ՝ բանակցությունների հիմնական թեմաներն են լինելու Վենեսուելայում շարունակվող ներքաղաքական ճգնաժամը և Հյուսիսային Կորեայի միջուկային ծրագրի ապագան:
Թեև Հարավային Կովկասում հակամարտությունների թեմաների վերաբերյալ քննարկումների մասին տեղեկատվություն չի հաղորդվել, սակայն չի կարելի բացառել, որ նման քննարկումներ, այնուամենայնիվ ընթանան:
Բանն այն է, որ Ռուսաստանի ակտիվությունը վերջերս ղարաբաղյան կարգավորման գործընթացում հանգեցնելու է մի իրավիճակի, երբ կամ ԱՄՆ-ը պետք է հայտնի իր համաձայնությունը Միացյալ Նահանգների հետ, կամ շարունակի իր առանձին խաղը Հայաստանի ու Միացյալ Նահանգների հետ:
Ըստ ամենայնի, կընտրվի առաջին տարբերակը:
Մի քանի օրից Սոչիում Ռուսաստանի արտգործնախարարի և Միացյալ Նահանգների պետքարտուղարի հանդիպումն, այս առումով, կարող է որոշակի ճշգրտումների համար հարմար առիթ դառնալ:
Թե որքան է Ռուսաստանին «ազատություն» տրված արցախյան հարցում՝ առայժմ պարզ չէ: Դատելով «կազմակերպչի» դերի մեջ մտած Ռուսաստանի իշխանությունների ակտիվությունից, այժմ Ռուսաստանը շարունակում է վարել արցախյան կարգավորման գործընթացում բանակցությունների կազմակերպման, անգամ՝ որոշակի պայմանավորվածությունները հարգելու ու պահանջներ կատարելու գործընթացները:
«Բոլորը բոլորի հետ»՝ գերիներին փոխանակելու հարցն, օրինակ, դրանցից մեկն է:
Օրինակ, օրեր առաջ հայտնի դարձավ, որ Ադրբեջանում ձերբակալված ու կեղծ մեղադրանքով դատապարտված Ռուսաստանի քաղաքացի, ազգությամբ հայ Մարատ Ուլեդանով-Գալուստյանը վերջապես Բաքվի բանտից տեղափոխվել է Ռուսաստան։ Նշենք, որ գրեթե 3 տարի նրան պահել էին Բաքվի մեկուսարանում՝ հայկական ծագման պատճառով։
Պաշտոնական Մոսկվան մշտապես նշում էր, որ Ադրբեջանի հետ երկկողմ հանդիպումների ու քննարկումների ընթացքում իրենք մշտապես բարձրացնում են իրենց քաղաքացիների, մասնավորապես Ուելդանով-Գալուստյանի հարցը։

Մետաքսյա Շալունց