Մոսկվայից ճնշել են

Անցած շաբաթ Հայաստանի և ՌԴ վարչապետների հանդիպման աղմուկ հանած դրվագը շատ ջուր է վերցնելու։ Հիշեցնենք, որ փոքրիկ այդ բառախաղը տարբեր ընկալումների առիթ տվեց, ոմանք համարեցին, թե ՌԴ վարչապետը ծաղրել էր Հայաստանի վարչապետին: ՌԴ վարչապետը ի պատասխան Հայաստանի վարչապետի հարցադրման՝ թե, եթե հարցեր չկան, ապա անցնենք… փորձել էր կատակել՝ ո՞ւր անցնենք: Այդ ամենը, անշուշտ, ռուսերենով: Մեդվեդևն ըստ երևույթին նկատի ուներ անցնենք ընդմիջման սրահ, որը, սակայն, շարունակություն չունեցավ Հայաստանի վարչապետի խոսքում:

Մեդվեդևի` Փաշինյանին ուղղված «Перейти куда?» կեսկատակ-կեսլուրջ հարցադրումն ու դրան հաջորդած ծիծաղը մի չհանդարտվող փոթորիկ բարձրացրեց: Խորհրդարանական մեծամասնության պատգամավորները, գործադիրի ներկայացուցիչները, մեկը մյուսին հերթ չտալով, նետվեցին շեֆի պատիվը պաշտպանելու, եւ անարգանքի սյունին գամեցին ՌԴ վարչապետին` շեշտելով Նիկոլ Փաշինյանի մեծահոգաբար լռելու ու «դուխով» լինելու հատկանիշը: Ոմանք անձնական վիրավորանք հասցրեցին ՌԴ վարչապետին. «անտակտ» անվանեցին։ Մեր տեղեկություններով՝ ՌԴ իշխանությունները չեն մարսել այդ ամենը եւ մեծ ճնշում են գործադրել ՀՀ իշխանություններին վրա` հատ առ հատ զգուշացնելով բոլորին, ովքեր արտահայտվել էին ու վիրավորել Մդվեդեւին։