Սկսեցին «տառապել» Արցախի ցավով
Բելառուսի նախագահ Ալեքսանդր Լուկաշենկոն հայտարարել է, որ ԵԱՀԿ-ն չպետք է աչք փակի եվրոպական տարածաշրջանում առկա հակամարտությունների վրա: Նա կազմակերպության անդամ երկրների ղեկավարներին կոչ է արել հանդիպել ու քննարկել անվտանգության ոլորտում առկա խնդիրները, գրում է ria.ru-ն:
«Այստեղ՝ մեր ընդհանուր տանը, կուտակվել են բազում խնդիրներ, որոնք պետք է լուծում ստանան՝ Լեռնային Ղարաբաղը, Մերձդնեստրը, ավելացել է Ուկրաինան և այն արդեն լուրջ հակամարտություն է, շատերն այն պատերազմ են անվանում»,-ասել է երկրի ղեկավարը:
Բելառուսի նախագահը նշել է, որ հաճախ է ԵԱՀԿ-ին քննադատում նրա համար, որ կառույցը շատ թույլ է արձագանքում այդ հարցերին: «Բայց չէ՞ որ դա ԵԱՀԿ աշխատանքի համար անմիջական թեմա է, քանի որ կառույցը նախևառաջ զբաղվում է եվրոպական մայրցամաքում անվտանգության ապահովման գծով: Ոչ մի դեպքում չի կարելի աչք փակել այդ խնդիրների վրա»,-ասել է Լուկաշենկոն ԵԱՀԿ Խորհրդարանական վեհաժողովի նախագահ Գեորգի Ծերեթելիի հետ հանդիպմանը:
Բելառուսի նախագահի կարծիքով՝ ԵԱՀԿ անդամ պետությունների ղեկավարները պետք է հավաքվեն ու քննարկեն ստեղծված իրավիճակից դուրս գալու հավանական ուղիները: «Ստամբուլից հետո պետությունների ղեկավարները մասշտաբային հանդիպում չեն ունեցել՝ չնայած որ դրա կարիքը կա: Պետք է հավաքվել և լուծել, եթե չհաջողվի լուծել, գոնե կուրվագծվեն ուղիներ, ինչ-որ հեռանկարներ»,-եզրափակել է Լուկաշենկոն:
Ալիևի ընկերը, շարունակում է օտարերկրյա գործընկերների հետ հանդիպմանը տաք պահել ԼՂ խնդրի թեման: Մյուս կողմից, հիմա էլ ավելացել է Հայաստանի դիրքորոշումը ՀԱՊԿ-ում՝ գլխավոր քարտուղարի հարցում: Բելառուսը չի կարողանում առաջ տանել իր թեկնածուին, սա էլ իր հերթին լրացուցիչ գործոն է, որ «Բատկան» ընդդեմ հայկական կողմի շարունակի իր քաղաքականությունը:
Օրերս, հիշեցնենք, որ ղարաբաղյան թեման նաև քննարկվել Պուտին-Ալիև մակարդակով: Ռուսաստանի և Ադրբեջանի նախագահները հանդիպման ընթացքում քննարկվել էին նաև ԼՂ հակամարտությունը: Վլադիմիր Պուտինը հայտարարել էր, որ Ռուսաստանը, որպես ԵԱՀԿ Մինսկի խմբի համանախագահ, ջանքեր չի խնայի հակամարտության կարգավորման համար:
Ալիևը բարձր է գնահատել ՌԴ-ի ջանքերը` որպես ԵԱՀԿ Մինսկի խմբի համանախագահի, հակամարտության կարգավորման գործում: Նրանք նաև վստահություն էին հայտնել Բաքվի և Մոսկվայի միջև երկկողմ հարաբերությունների հետագա հաջող զարգացման հարցում:
Թամար Բագրատունի
Հետևեք մեզ Viber-ում
