Փաշինյանի սրած բիզը

Երևանի Աջափնյակ վարչական շրջանի ղեկավարի տեղակալ Արամ Մանուկյանը կրկին հայտնվել է քննարկումների կենտրոնում: Նա երեկ գիշեր մի քանի րոպեն մեկ պարբերականությամբ գրառումներ է կատարել ԱԱԾ տնօրեն Արթուր Վանեցյանի մասին:
Վարչական շրջանի ղեկավարի տեղակալը, մասնավորապես, անդրադարձել էր «168 ժամ» թերթի այն տեղեկություններին, որ ԱԱԾ-ն պետական վերահսկողական ծառայության պետ Դավիթ Սանասարյանի գործով տեսանյութ է ներկայացրել վարչապետ Փաշինյանին և գրել. «Թե բա վիդեո կա, ԱԱԾ-ն յուղ ա վառում, բա էդ պահին բռնեիք։ Հիմար կառույց ա, սաղ հանցագործները իրենց հաճույքով փողերը ծախսում են: Հ. Գ. Վանեցյան, ջեբս բան չքցես, չի անցնի»։
Այն, որ Պետական վերահսկողական ծառայության պետի նկատմամբ մեղադրանքի առաջադրումը «Քաղաքացիական պայմանագիր» կուսակցությունում լարվածություն է առաջացրել, դա ակներեւ է։ Բայց այն կարգի գնահատականներ, ինչպիսին այս պաշտոնյան է ներկայացրել, առնվազն տարօրինակ էր: Նա մեկ րոպե պարբերականությամբ ֆեյսբուքյան իր էջում մեղադրական ու հեգնախառն գրառումներ էր կատարում, ինչից ակնհայտ տպավորություն կար, որ կամ մարդը չի կարողանում մտքերն ամփոփել ու բովանդակալից մի տեքստ ներկայացնել, կամ էլ գտնվում էր ոչ սթափ վիճակում:
Աջափնյակի ղեկավարի տեղակալ Արամ Մանուկյանի ֆեյսբուքյան էջում արված գրառումներից հասկացվում էր, որ նա ցանկանում է պաշտպանել Սանասարյանին. «Սաշիկին ու իրա թուլեքին գոնե հետ բերեք ու փակեք, թե չէ նենց տպավորություն է, որ սա իշխանափոխություն էր՝ վլաստը տալիս ենք, բայց մեզ ձեռ չտաք>>: <<Ու պատրաստ եմ էտ շարունակել։ Չեմ ուռում աշխատավարձս հերիքում ա, ասածս ինչ ա, գրպանս բան չգցեք, անիմաստ ա»։ «Էլի ասեմ՝ չխառնեք հանկարծ, կարամ էլի տեղակալ չաշխատեմ, չեմ նեղվի դրանից»։ Գրառումներից մի քանի ժամ անց Մանուկյանի ֆեյսբուքյան էջը ջնջված էր։ Անջատված էր նաև նրա հեռախոսահամարը, նա աշխատանքի չի էլ գնացել եւ ինչպես թաղապետարանից են ասում, երեւի հերթական անգամ մի լավ խմել, խելքը թռցրել է: Հիշեցնենք, որ մարտի 15-ին էլ նա իր ֆեյսբուքյան էջում գրել էր․ «Երկուշաբթի գրում եմ դիմումս։ Ցանկություն չունեմ աշխատելու անթասիբ ու անինքնասեր ղեկավարի հետ»։ Հետո սակայն հայտարարեց, որ թյուրիմացություն է տեղի ունեցել և որ Մանուկյանը հեռախոսը կորցրել էր ու գրառումն էլ ինքը չէր արել։ Հետաքրքիր է, այս անգամ ինչ է պատճառաբանելու թաղապետի տեղակալը։ Ըստ էության փոխթաղապետը կասի, որ ինչ որ ժամանակով ուղեղն է կորցրել, այլապես այլ հիմնավորում նրան չի փրկի: Իրականում սա դեռ առաջին ծիծեռնակն է Փաշինյանի իշխանության ու ապագայում դեռ որքան նման պայթյուններ են լինելու:

Ահա, թե ինչ է լինում, երբ պաշտոններ են տալիս քայլարածներին՝ հաշվի չառնելով ոչ կրթական մակարդակը, որ փորձը, ընդհանրապես ոչինչ: Լինում է այն, որ սրած բիզը մտնում է տիրոջ համապատասխան տեղը:

Անի Սահակյան