Ինչպես է հնարավոր խոպանչի բարեկամների շնորհիվ դառնալ միլիոնատեր. հեղափոխական հեքիաթ

Պետական վերահսկողական ծառայության պետի շատ երիտասարդ տեղակալ Արգիշտի Քյարամյանի շուրջ աղմուկը չի դադարում: Նա մի սկանդալից դուրս է գալիս, ընկնում մյուսի մեջ: Մինչ լրատվադաշտը երեկվանից բացահայտում էր 28-ամյա Արգիշտիի ծագումնաբանությունը, քանզի ոչ ինքը, ոչ հայրը չէին խոստովանում, որ հայր ու որդի են: Քանզի ՊՎԾ նորանշանակ պետի տեղակալ Առաքել Քյարամյանի (քաղաքացիական անունը՝ Էլբեկ)՝ Կոտայքի թեմի առաջնորդի, եպիսկոպոսի որդին է, ով կուսակրոն է, եւ ում Հայ առաքելական եկեղեցու կանոններով արգելված է ամուսնությունը եւ ըստ այդմ՝ զավակ ունենալը։

Առաքել սրբազանը կաթողիկոսի մերձավոր անձանցից է, ժամանակին Սեւանի ճեմարանի տեսուչն է եղել, ապա ոստիկանության հոգեւոր պատասխանատուն։ Արգիշտի Քյարամյանը նախկին ոստիկանապետ Վովա Գասպարյանի սանիկն է նաեւ, թեեւ երեկ ՊՎԾ պետի տեղակալը հերքել է քավոր-սանիկական հարաբերությունները Գասպարյանի հետ, եթե դա ինչ-որ իմաստով ստացվեց, ապա կուսակրոն քահանայի որդի լինելու փաստը չհերքվեց, քանզի իրեղեն ապացույցներ՝ փաստաղթեր կան այդ մասին: Ինչեւէ, եթե վերը նշված իրողությունները չեն կարող խարան դառնալ երիտասարդ պաշտոնյայի գործունեության ընթացքում, առավել եւս չեն կարող խոչընդոտել պետական ապարատում պաշտոն զբաղեցնելու հարցում, ապա կա մի թվացյալ անհաղթահարելի արգելք: Խոսքը Արգիշտի Քյարամյանի պաշտոնական հայտարարագիրն է, որտեղ պետական պաշտոնյան հավատարմագրել է ավելի քան 32 միլոին դրամ: Թե որտեղից 28-ամյա երիտասարդին այդքան կարողություն, եթե նախկինում աշխատել է պտական ապարատում, Արգիշտի Քյարամյանը երեկվանից համառորեն չէր ցանկանում տալ հարցի պատասխանը: «Էս հարցին էսպես կպատասխանեմ։ Ես աշխատել եմ տարբեր ուժային կառույցներում, զբաղեցրել եմ տարբեր պաշտոններ, ես պաշտոնապես հայտարարում եմ, որ երբևէ որևէ կոռուպցիոն սկանդալում չեմ եղել, որևէ կլանային համակարգում չեմ եղել, ոչ էլ բիզնեսով եմ զբաղվել։ Եվ ես կոռեկտ չեմ համարում իմ ունեցվածքն էս համատեքստում քննարկել»։

Դիտարկմանը, թե կասկածներ կարող են լինել, որ կոռուպցիոն ճանապարհով են ձեռք բերվել այդ գումարները, ՊՎԾ պետի տեղակալը, որ իր 28-ամյա տարիքին հասցրել է ոստիկանությունում, դատախազությունում և Քննչական կոմիտեում աշխատել, ասել էր, որ եթե կոռուպցիոն կասկածներ կան, դրա համար կան համապատասխան իրավապահ մարմիններ, և կոռուպցիոն բնույթի խնդիրները պետք է պարզաբանվեն իրավապահ մարմինների դաշտում։

Սակայն մեկ օր անց Արգիշտի Քարամյանը իր ունեցվածքի վերաբերյալ հայտարարություն է տարածել, որով ասում է, թե այդ գումարը Եվրոպայում գտնվող քեռուց է ստացել.<< Հայտնում եմ, որ
հայտարարագրումս ներկայացված դրամական միջոցների մի զգալի մասն ինձ
նվիրել է Եվրոպայում բնակվող քեռիս՝ գնում կատարելու նպատակով, սակայն հետագայում այդ գնումը նպատակահարմար չեմ համարել։ Հիշյալ գումարների մի մասն էլ
ձևավորվել է Ռուսաստանի Դաշնությունում արտագնա աշխատանքով զբաղվող
մերձավոր ազգականներիս և մեր ընտանիքի այլ բարեկամների պարբերական
նվիրատվություններից, ովքեր միշտ գումարային օգնություններ են տրամադրել
ինձ՝ հաշվի առնելով այն հանգամանքը, որ ես չեմ զբաղվում ձեռնարկատիրական
գործունեությամբ>>:

Փաստորեն, ստացվում է, որ երիտասարդ տղան խոպանչի բարեկամների շնորհիվ դարձել է միլիոնատեր: Իհարկե, պատկան մարմինները կարող են այս հեքիաթին հավատալ, բայց մենք՝ անշուշտ ոչ, քանզի տասնյակ եւ հազարավոր այդպիսի հեքիաթներ ենք լսել դեռ ՀՀԿ-ի ժամանակներում, որտեղ ամեն ինչ թղթերով ճիշտ էր:

Անի Սահակյան