Օսիպյանի ռեկորդը՝ հրապարկվել է ֆանտաստիկ թիվ

ՀՀ պետական բյուջեի 2018 թվականի կատարողականի հաշվետվության <<Հասարակական կարգի պահպանություն>> բաժնում ոստիկանությունը ֆանտաստիկ թիվ է հրապարակել։ Պարզվում է՝ անցած տարի ավելի քան 865 հազար ոստիկանության ծառայող ներգրավված է եղել հասրակական կարգի պահպանության միջոցառումներում։ Իսկ անցած տարվա ամենագլխավոր միջացառումը, ինչպես հայտնի է, Նիկոլ Փաշինյանի գլխավորությամբ ապրիլ-մայիս ամիսներին տեղի ունեցած թավշյա հեղափոխությունն է։ Եվ այսպես․ ՀՀ կառավարության կայքում հրապարակված հաշվետվության մեջ սևով սպիտակի վրա գրված է․  «Ապրիլ-մայիս ամիսներին ՀՀ ոստիկանության գրեթե բոլոր ստորաբաժանումները ներգրավված են եղել հասարակական կարգի պահպանության և հասարակական անվտանգության ապահովման աշխատանքներին: Բացի այդ, տարին հագեցած էր մի շարք համապետական նշանակություն ունեցող միջոցառումներով, ինչպիսիք էին Ֆրանկոֆոնիայի միջազգային կազմակերպության գագաթնաժողովը, Երևանի հիմնադրման 2800-ամյակին նվիրված միջոցառումները, ՀՀ ԱԺ և Երևանի ավագանու արտահերթ ընտրությունները, որոնց պատշաճ կազմակերպումն ու անցկացումը պայմանավորված էր նաև ՀՀ ոստիկանության մեծաքանակ ծառայողների և ուժերի ներգրավվածությամբ: Ընդհանուր առմամբ, տեղի ունեցած 5767 միջոցառումներին ներգրավված են եղել 865050 ծառայող»:

Եթե այստեղ վրիպակ չկա, ապա ոստիկանության պետ Վալերի Օսիպյանը պետք է լուրջ բացատրություն տա, որովհետև Հայաստանում 865050 ոստիկանության ծառայող ուղղակի չի կարող լինել։ Սա աբսուրդային ցուցանիշ է, որի իսկությունը անհավատալի է։
Հաշվետվության մեջ նշվում է նաև, որ ՀՀ ոստիկանությունն արդյունավետ պայքար է իրականացրել նաև հանցավորության դեմ: 2018 թվականին հանրապետությունում գրանցվել է 22551 հանցագործության դեպք (2017թ.` 20284), որից 60.8%-ի դեպքում քրեական գործով անձը ներգրավվել է որպես մեղադրյալ, այդ թվում՝ առանձնապես ծանր հանցագործությունների 224 դեպք (2017թ.՝ 164), որից 59.7%-ի դեպքում քրեական գործով անձը ներգրավվել է որպես մեղադրյալ, ծանր հանցագործությունների 3638 դեպք (2017թ.՝ 2729), որից 38.0%-ի դեպքում քրեական գործով անձը ներգրավվել է որպես մեղադրյալ:
Ընդհանուր առմամբ, դեպքերի աճը հիմնականում պայմանավորված է երկու խումբ հանցատեսակների աճով:
Առաջինը կոռուպցիոն բնույթի հանցագործություններն են: Եթե 2017 թվականին արձանագրվել էր կոռուպցիոն բնույթի 634 դեպք, ապա 2018 թվականին դրանց թիվն աճել է մոտ 2 անգամ՝ կազմելով 1353: Այս հանցագործություններն իրենց բնույթով դասվում են առավել լատենտային հանցատեսակների շարքին, և դրանց թվի աճը, ինքնին, դրական արդյունք է, քանի որ դրանց հայտնաբերումն իրավապահ մարմինների համար բավականին բարդ է և պահանջում է օպերատիվ-քննչական լայնածավալ միջոցառումների պատշաճ իրականացում:
Հայտնաբերված դեպքերի 56.2%-ն ի հայտ է բերվել ոստիկանության մարմինների կողմից:
Կոռուպցիոն բնույթի հանցագործություններով ոստիկանության ստորաբաժանումների կողմից իրականացված գործողությունների արդյունքում 2018 թվականին բացահայտվել է պետությանը, կազմակերպություններին և անձանց հասցված շուրջ 5.7 մլրդ դրամի վնաս (2017 թվականին` շուրջ 735 մլն): Վերականգնվել է շուրջ 654 մլն դրամի վնասը:
Ընդհանուր հանցագործությունների թվի աճի վրա էապես ազդել է նաև սեփականության դեմ ուղղված հանցագործությունների քանակի նկատելի ավելացումը՝ մոտ մեկ քառորդով (8102-ից 10112)։ Մարդու դեմ ուղղված հանցագործությունների տեսակարար կշռի նվազումը՝ (24.0%-ից 21.3%) դրական միտում է։ Այս համատեքստում հատկապես դրական կարելի է համարել այն իրողությունը, որ 2018 թվականի ընթացքում արձանագրվել է սպանությունների նվազագույն թիվը (35) վերջին 40 տարիների ընթացքում:

Հայկ Դավթյան