Ձեռնոց՝ Շմայսին և Թոխմախի Մհերին

Նոր խորհրդարանը ձեռնոց է նետել նախորդին , այստեղ էլ նոր շմայսներ, թոխմախներ ու լֆիկներ են մեր աչքի առջեւ աճում: Նրանք, անկասկած, իշխող հեղափոխականների շարքերում են, այս մարդկանց անդորրը փոթորկվել էր ընդդիմադիր խմբակցությունների երկու նախագծերից: «Իմ քայլը» խմբակցությունը պաշտպանության, ներքին գործերի և ազգային անվտանգության հանձնաժողովում մերժել էր ընդդիմադիր երկու խմբակցությունների նախագծերը, որոնք վերաբերվում էին զինծառայողներին։ «Լուսավոր Հայաստանն» առաջարկում էր փոխհատուցել ծառայության ընթացքում առողջությունը վնասած զինծառայողներին։ «Իմ քայլը» դրան պատասխանում է իր քայլով։ «Համապատասխան հանձնաժողովի նիստում բացասական եզրակացություն եղավ, բայց անմիջապես կառավարությունը հանդես եկավ նմանաբովանդակ նախաձեռնությամբ, կառավարության որոշման մակարդակով ներկայացրեց և դրեց շրջանառության մեջ»,- դժգոհեց ԱԺ ԼՀԿ խմբակցության անդամ Տարոն Սիմոնյանը՝ ողջ թիմին դնելով իշխող մեծամասնության հարվածի տակ: ԲՀԿ-ն իր հերթին առաջարկում էր առաջնագծից հետ քաշել 18-ից 20 տարեկան զինակոչիկներին և այնտեղ տեղաբաշխել պայմանագրային զինծառայողների։ Սրան նույնպես դեմ է «Իմ քայլը»։ Համարում է պոպուլիզմ։ «Լու՞րջ եք ասում, ժողովուրդ։ Ուրեմն․․․ մի ընդհատեք»,- ամբիոնից հեգնեց Փաշինյանի թիմակից Համազասպ Դանիելյանը՝ այն ելույթներին ի պատասխան, թե նախագիծը ժողովրդի լայն հատվածների մտահոգությունն է, օդից կախված չէ եւ այլն:

Իշխանությունը երկու ճակատով գրոհ վերցրեց ԼՀԿ-ի ու ԲՀԿ-ի դեմ, ի վերջո Մխիթար Հարությունյանն ամբիոնից մատ թափ տվեց.«Պարոն Գորգիսյա՞ն։ Իյա, պարոն Գորգիսյան, լռեք, ոնց Դուք լռեք, Ձեզ եմ ասում, փոխեք Ձեր հռետորաբանությունը և ոճը, սա խնդրանք է և չեմ ուզում ընկալվի որպես սպառնալիք, որ, եթե Դուք չփոխեք էս ամենը, մենք կփոխենք մեր ոճը։ Եվ ես չեմ ուզում որևէ մեկը խաբվի մեր երիտասարդ տարիքով, իսկ դուխի հետ կապված, ինձ թվում է պրակտիկորեն էս հատվածն առնվազն ապացուցել է, որ ունի։ Պարոն Մարուքյան, ուրեմն լռեք, այ քեզ բան, մյուս անգամ չեմ թողնի ձեն հանեք, լռեք, ասեցի, դու չի, Դուք ա Ձեր համար»:

Իսկ Համազասպ Դանիելյանն էլ Էդմոն Մարուքյանին մեղադրեց իշխանության դեմ սաբոտաժ անելու մեջ:Մարուքյանը ԱԺ ամբիոնից վրդովված հայտարարեց՝ «Ով է սաբոտաժ անում»,- բավական չէ՞ ամեն առիթով մեզ մեղադրել հակահեղափոխականության մեջ՝ ե՞րբ եք մի լավ բան արել, որ չենք աջակցել ձեզ, ի՞նչ եք արել էս ամիսներին, որ խանգարել ենք, ով կարող է հիմա ձեզ խանգարել, էս երկրում չկա ուժ, որ կարող է սաբոտաժ անել ձեզ, 88 մանդատ ունեք եւ անսահմանափակ իշխանություն՝ արեք, գործ արեք։

ԱԺ-ում մի կաթիլ մեղրի այս պատմությունը դեժավյու առաջացրեց մի քանի դրվագով, նախ, որ ՀՀԿ-ն էլ էր մշտապես մերժում ընդդիմադիրնեի նախագծերը, հետո պետք եղած դեպքում դրանք պլագիատ անում, երկրորդ՝ ՀՀԿ-ն էլ այնքան ապահով էր իրեն զգում, որ նույնիսկ ուղիղ եթերով հրապարակվող ԱԺ նիստերին ցուցադրում էր իր բեսպրեդելը, մատ թափ տալիս քաղաքական օպոնենտների վրա, եւ վերջապես դեժավյուն այն իմաստով էր, որ ամիսներ առաջ էլ Փաշինյանը հայտարարում էր, թե ՀՀԿ-ականները սաբոտաժ են անում, իրենց չեն թողնում աշխատել, ու չնայած հակառակ հավաստիացումներ էին հնչում, թե իրենք չեն խոչընդոտում խորհրդարանական աշխատանքներին, թեկուզ ունեն մեծամասնություն այդուհանդերձ Փաշինյանը առաջ տանելով իր պնդումները հասավ նպատակին:

Հիմա ստացվում է, որ իշխանությունն էլ իր չարածների մեղքը փորձում է բարդել ուրիշների վրա ու կրկին խոսում է սաբոտաժի մասին՝ խորհրդարանում ունենալով բացարձակ մեծամասնություն: Այս ուժի պատգամավորների ցինիկ պահվածքն ու նման հայտարարությունները մի բանի մասին են վկայում, չեն տեսել պատից կախ, տեսել են ճակատներից կախ ու հիմա կարող են նախկինների պես մատ թափ տալ գործընկերների վրա, հատկապես, որ չունեն անելիք եւ միակ աշխատանքը մնում է ընդդիմության դեմ պատերազմը:

Անի Սահակյան