Նարինե Թուխիկյանի սենսացիոն հայտարարությունը. նոր սպառնալիք

Վարչապետ դառնալու առաջին օրվանից Նիկոլ Փաշինյանը պատեհ-անպատեհ առիթներով բազմիցս է հայտարարել Ռռուսաստանի,ինչպես նաեւ անձամբ Վլադիմիր Պուտինի հետ ունեցած փայլուն հարաբերությունների մասին: Չնայած մյուս կողմից մենք բոլորովին հակառակ պահվածք ենք տեսել, նույն ՀԱՊկ-ի նախագահությունից զրկել, ռուսական ռազմաբազայի առանց զգուշացնելու զորավարժություններ Շիրակի մարզի գյուղերում, տնտեսական կապիտալի հետ կապված խնդիրների առաջացում, Ռոբերտ Քոչարյանին ուղղված ծննդյան եւ այլ շնորհավորանքներ, փոխարենը զրո վերաբերմունք իշխանությունների նկատմամբ:

Այդուհանդերձ Նիկոլ Փաշինյանը անցած տասը ամիսներին մի քանի անգամ հայտարարել է հայ-ռուսական <<փայլուն>> հարաբերությունների մասին: Խորհրդարանական ընտրություններից հետո Ռուսաստան կատարած հերթական այցի ընթացքում նա անգամ չթաքցրեց հրճվանքը, որ հաճախակի է լինում այդ երկրում.« Ես արդեն կորցրել եմ հաշիվը, թե սա մեր որերորդ հանդիպումն է: Բայց օդանավակայանում արարողակարգի աշխատակիցներն ինձ հուշեցին, որ ես Ռուսաստանի Դաշնություն ամենահաճախ այցելող օտարերկրյա ղեկավարներից եմ, ավելի կոնկրետ` ես ղեկավարների եռյակում եմ: Վստահ եմ, կարծում եմ` դա ընդգծում է մեր առանձնահատուկ ռազմավարական հարաբերությունների համատեքստը: Վստահ եմ, որ մեր հարաբերությունների այսպիսի դինամիկան կպահպանվի: Հույս ունեմ, որ նաև կզարգանա: Իհարկե, մենք մյուս տարի սպասում ենք Ձեզ պաշտոնական այցով Հայաստանում: Դա մեզ համար շատ ուրախալի կլինի»,- հույս հայտնեց նա:
Եւ ահա, այսպիսի << փայլուն>> հարաբերությունների պայմաններում Նիկոլ Փաշինյանի թիմակից պատգամավորը սենսացիոն հայտարարություն է անում, որը ոչ այլ ինչ է, քան անարգանք Ռուսաստանի նկատմամբ:
ԱԺ-ում «Հեռուստատեսության եւ ռադիոյի ազգային հանձնաժողովի 2018 թվականի գործունեության մասին» հաշվետվության ներկայացման ժամանակ «Իմ քայլը» կառավարող խմբակցության պատգամավոր Նարինե Թուխիկյանն անդրադարձել է Ռուսաստանյան որոշ հեռուստաընկերությունների՝ Հայաստանում հեռարձակման խնդրին: Մասնավորապես, «Ռոսիա» պետական ալիքը պատգամավորի կարծիքով եթեր է հեռարձակում ակնհայտ հակահայկական ուղղվածությամբ հաղորդումներ, որոնք հայերի հանդեպ ատելության կոչ են անում։Նարինե Թուխիկյանը Հեռուստատեսության եւ ռադիոյի ազգային հանձնաժողովի նախագահ Տիգրան Հակոբյանին հարցրել է, թե կարելի՞ է արդյոք սահմանափակել կամ արգելել այդ ալիքի առանձին հաղորդումների հեռարձակումը Հայաստանի տարածքում։
«Ես ձեզ հետ համաձայն եմ։ Դա որոշակի սպառնալիք է ստեղծում Հայաստանի տեղեկատվական անվտանգության համար», -պատասխանել է Տիգրան Հակոբյանը, նշելով, որ շատ երկրներ, ինչպես Ուկրաինան եւ Վրաստանը, արդեն իրականացրել են այդ գաղափարը, բայց դրա համար նրանք շատ բարձր գին են վճարել։ «Պատրա՞ստ ենք արդյոք մենք գնալ դրան եւ վճարել նույն գինը, ինչ այդ երկրները։ Չէ՞ որ նրանք զրկվել են իրենց տարածքի մի մասից։ Գուցե կգա ժամանակը, երբ մենք կհայտնվենք ավելի նպաստավոր վիճակում եւ կկարողանանք իրականացնել այդ գաղափարը, բայց հիմա դրա իրականացումը ցանկալի չէ», -իրավացիորեն նկատել է Տիգրան Հակոբյանը:

Հիմա, իսկապես, հետաքրքիր է, այս հայտարարությունը պատգամավորն ինքնուրույն է արել, թե համաձայնեցրել է վարչապետի հետ, հակառակ պարագայում իշխող ուժը այսպիսի սենսացիոն հայտարարությամբ նոր սպառնալիք է իր գլխին կախում:

Անի Սահակյան