Ծառուկյանը համոզվեց, որ Փաշինյանին քննադատել չի կարելի` ստուգումներ կլինեն

«Բարգավաճ Հայաստան կուսակցության» առաջնորդ Գագիկ Ծառուկյանին պատկանող «Առինջ Մոլ» առևտրի կենտրոնում ՊԵԿ-ը անսպասելի ստուգումներ է սկսել: ՊԵԿ-ի նման որոշումը պայմանավորված է ահազանգով՝ որի համաձայն տաղավարների վարձավճարները նախատեսվածից շատ են վերցնում, սակայն քիչ թիվ են ցույց տալիս:
«Առինջ Մոլ» ընկերության տնօրեն Սամվել Հակոբյանի խոսքով՝ վարձավճարների հետ կապված ահազանգը իրականության հետ կապ չունի և ոչ-ոք չի կարող նման բան ապացուցել:

Աշխատակիցները դժգոհություն են հայտնել, որ ստիպված են եղել փակել իրենց տաղավարները, մինչդեռ ամեն ժամը կարևոր է նրանց ՝օրվա հացը վաստակելու համար:
Ուշագրավ է, որ ՊԵԿ-ի ստուգումներն հաջորդեցին ԱԺ-ում Գագիկ Ծառուկյանի նախօրեին արած հայտարարություններին: Ծառուկյանը լրագրողների հետ հարցուպատասխանի ժամանակ նշել էր, որ ինքը դժգոհ է Նիկոլ Փաշինյանի թիմից. «Երևում է, որ Փաշինյանն ուզում է ինչ-որ բան անել, ինչ-որ բաներ փոխել, բայց դրա համար նրա կողքը պետք է ոլորտներից հասկացող համապատասխան մարդիկ լինեն: Ես Նիկոլ Փաշինյանից դժգոհ չեմ, Նիկոլ Փաշինյանի թիմից եմ դժգոհ, տարբեր ոլորտներում համապատասխան մարդ պետք է լինի, որ մատից փուշ հանող լինի: Մենակ մարդը չի կարող ներքին, արտաքին, տնտեսական, քաղաքական, բանկային, վարկային, ներդրումային…անհնար է: Ամեն ոլորտում պետք է լինի փորձառու մարդ, որ իր աշխատանքով անի, որ համապատասխան ծրագրերն իրականանան: Հակառակը, բոլորը խնդիր են սարքում վարչապետին»,- հայտարարել էր Ծառուկյանը: Հարցին, թե իբրև խոշոր գործարար ինչպես է պատրաստվում աջակցել Նիկոլ Փաշինյանի ասած տնտեսական հեղափոխությանը` Ծառուկյանը տվել է քաղաքական պատասխան. «Ես դուխով գործարար չեմ»: Այս խորհրդանշական արտահայտությունը, թերևս, նշանակում էր, որ Ծառուկյանը ձեռքերը լվանում է տնեսական հեղափոխությունից և դրա պատճառը հենց կադրերն են, որ կան:

Փաստորեն, ՊԵԿ-ն անմիջապես հանդես է եկել պատասխան հարվածով` ստուգող բրիգադներ ուղարկելով Ծառուկյանի ընկերություն:Սա շատ հստակ ուղերձ է, որ Փաշինյանին ու նրա թիմին քննադատելուց առաջ պետք է զգուշանալ, ցանկալի է ընդհանրապես խուսափել, որովհետև դրան կհաջորդեն առնվազն ստուգումներ ու տուգանքներ: Գուցե սրանք պրոֆիլակտիկ ստուգումներ են` ԲՀԿ-ի հետագա քննադատությունները կանխելու և մնացածներին դաս տալու նպատակով:

Հայկ Դավթյան