Մինչ Ադրբեջանը սրում է նիզակները, Հայաստանում բռնոցի-պպզոցի-ասֆալտին փռոցի են խաղում ու զբաղված են ինչ-որ անհասկանալի տրանսգենդերային թեմաներով. Հ. Հարությունյան
«Հայաստանում բռնոցի -պպզոցի -ասֆալտին- փռոցի են խաղում ու զբաղված են ինչ որ անհասկանալի տրանսգենդերային թեմաներով: Թշնամու քթի տակ, մեր մեջ ենք թշնամուն փնտրում և այլն»: Գրում է Թիվ 5 հեռուստաընկերության գործադիր տնօրեն Հարություն Հարությունյանն իր ֆեյսբուքյան էջում։ Գրառումն ամբողջությամբ ներկայացված է ստորև․
«Վերջին օրերին Ադրբեջանի առաջին զույգի հայտարարություններին միացավ դրանց պաշտպանության նախարարը: Սկզբից տիկինը՝ Մեհրիբնը խոսեց, հետո ամուսինը՝ «քաղցրացրեց» , այսօր էլ դրանց պաշտպանության նախարարը հանդես եկավ հայտարարությամբ և հանձնարարական տվեց գեներալիտետին: Արցախից Դավիթ Բաբայանի խոսքում տագնապ զգացի: Չէ, դուխը տեղն էր, բայց տողատակում տագնապը ակնհայտ էր, կար:
Հայաստանում բռնոցի -պպզոցի -ասֆալտին- փռոցի են խաղում ու զբաղված են ինչ որ անհասկանալի տրանսգենդերային թեմաներով: Այնպիսի տպավորություն է, որ մենք ուրիշ դարդ ու ցավ չունենք: Իրար վրա գրում ենք, իրար միս ենք ծամում, որսագողերի պես ֆեյքեր ենք փնտրում, թշնամու քթի տակ, մեր մեջ ենք թշնամուն փնտրում և այլն:
Մի քանի ժամից Ստեփանակերտի եկեղեցու օծումն է: Արցախի մայրաքաղաքը խնկաբույրով է լցվելու իսկ մեր «խաղաղասեր հարևանի» խոսքից վառոդի հոտ է փչում: Ամեն օր այդ հոտը ավելի ուժգին է փչում, մրրկահողմի պես պտտվում է օդում:
Մեր վիճակը շատ նման է էն՝ Ավարայրի ճակատամարտից մեկ օր առաջ անկտդոտին:Չպատմեմ, գիտեք: Աստծո հույսին՝ ծնված, մեծացած ու ծերացող ազգ ենք:
Ծերության երկու տեսակ կա, իմաստուն և իմաստազուրկ՝ հիշողությունը կորցրած: Մենք էքստազի մեջ կորցրել ենք հիշողությունը, իսկ առանց հիշողության, զգոն չես լինի: Զգոնությունն ու հիշողությունը քույր ու եղբայր են:
Մեզ մոտ այնպիսի շիլաշփոթ է, որ չես հասցնում մի թեման մարսել, կենտրոնանալ, երկրորդ ու շատ դեպքերում, երրորդ, չորրորդ թեմաներն են խաղի մեջ գցում ու շեղում: Բոլոր դեպքերում, մինչ այստեղ հեղափոխական խրախճանք է, այնտեղ սրում են նիզակները, սրերը և լողացնում են փղերին:
Այստեղ ոմանք ապրիլի 2-ը ամոթի օր են համարում, այնտեղ՝ պարտված հերոսներին են մեծարում :
Եւ այս ֆոնին մեր Նախագահը ՄԱԿ-ի գլխավոր քարտուղարի հետ, Հորդանանում, զրուցում են Ալիև-Փաշինյան հանդիպման արդյունքներից»:
Հետևեք մեզ Viber-ում
