Միջսիրիական բանակցությունները կանցնեն առանց քրդերի

Միջսիրիական բանակցությունների հերթական փուլը, որը պլանավորված էր ապրիլի կեսին, հավանաբար կրկին կանցնի առանց քրդերի մասնակցության, հայտնում է RIA Novosti-ն: ՄԱԿ-ի ԱԽ արևմտյան անդամները՝ Ֆրանսիան, Մեծ Բրիտանիան և ԱՄՆ-ն չորեքշաբթի օրը արգելափակել են Ռուսաստանի հայտարարության նախագիծը միջսիրիական բանակցություններին ավելի ներկայացուցչական բնույթ տալու վերաբերյալ: Դամասկոսում դա գնահատել են որպես երկխոսությունը դանդաղեցնելու փորձ: Ռուսաստանում սիրիական Քրդստանի ներկայացուցիչները խոստացել են չընդունել առանց իրենց ընդունված «Ժնև-3»-ի արդյունքները: ՌԴ ԱԳՆ-ում հայտնել են, որ կձգտեն հասնել քրդերի մասնակցությանը Ժնևի հանդիպմանը: ՌԴ ԱԳՆ-ն հայտարարել է, որ քրդերի մասնակցության մասին հայտարարության արգելափակումն արվել է ի շահ տարածաջրջանային խաղացողների: Այնտեղ նշել են, որ ԱԽ-ի արևմտյան անդամները, որոնց հարել է նաև Ուկրաինան, ըստ էության արգելափակել են նախագիծը՝ առաջարկելով ուղղումներ: «Այդպիսի դիրքորոշումը չի կարող խորը ափսոսանք չառաջացնել, քանի որ այն հակասում է Սիրիայի աջակցման Միջազգայի խմբի որոշումներին և ՄԱԿ-ի ԱԽ 2254 բանաձևին: Ակնհայտ է, որ այդ բոլորն արվել է ի շահ մի քանի տարածաշրջանային խաղացողների, որոնց համար ամբիցիաներն ավելի կարևոր են, քան սիրիական կարգավորման իրական առաջխաղացումները»,- ասված է փաստաթղթում: ՌԴ ԱԳՆ-ում հայտարարել են, որ միջսիրիական բանակցությունների հերթական փուլում կշարունակեն պնդել քրդերի՝ առաջին հերթին «Դեմոկրատական միություն» կուսակցության մասնակցությանը: Միաժամանակ, սիրիական ընդդիմության բանակցային բարձրագույն կոմիտեն (ԲԲԿ) համարում է, որ հակամարտության բոլոր կողմերն էլ, այդ թվում՝ քրդերը, մասնակցում են Ժնևի միջսիրիական երկխոսությանը, հայտնել է ԲԲԿ-ի պաշտոնական ներկայացուցիչ Ռիադ Նասան Աղան: «Քրդական ընդդիմադիր միավորումները ԲԲԿ-ում և պատվիրակությունում ունեն իրենց ներկայացուցիչները, որոնք բանակցություններին մասնակցում են սիրիական ընդդիմության անունից: Իսկ նրանք, ովքեր աջակցում են ռեժիմին (Սիրիայի նախագահ Բաշար Ասադին), պետք է բանակցություններին մասնակցեն ռեժիմը ներկայացնողների կազմում»,- ասել է նա Ռուսաստանի հայտարարության առիթով: