Արցախում ադրբեջանական դրոշի ծածանման երազանքն ու խորը փակուղին

Ադրբեջանում, ինչպես երևում է, դեռ չեն մարսել օրեր առաջ Հայաստանի պաշտպանության նախարար Տոնոյանի, ապա Փաշինյանի հայտարարությունները: Բաքվից նոր թափով են շարունակում արձագանքել այդ հայտարարություններին՝ մեկը-մյուսի հետևից:

Հիշեցնենք, որ ամերիկահայ համայնքի հետ հանդիպմանը Տոնոյանը ասել էր. «Տարածքներ խաղաղության դիմաց ձևաչափը ես վերաձևակերպել եմ, մենք հակառակն ենք անում՝ նոր պատերազմ, նոր տարածքների դիմաց»։ Իսկ Փաշինյանն անդրադառնալով սույն հայտարարությանը՝ նշել էր, որ ՀՀ Պաշտպանության նախարարն այլ բան չէր կարող ասել, եթե այլ բան ասեր, նա չէր աշխատի որպես պաշտպանության նախարար:

Բանը հասավ նրան, որ արդեն Մեհրիբան Ալիևան է «խաղի» մեջ մտնում:
Ադրբեջանն «անպայման կվերականգնի տարածքային ամբողջականությունը, և գրավյալ տարածքներում կծածանվի ադրբեջանական դրոշը», հայտարարել է երկրի փոխնախագահ, առաջին տիկին, Հեյդար Ալիևի հիմնադրամի առաջնորդ Մեհրիբան Ալիևան: Հանդիպելով 2016 թվականի ապրիլյան պատերազմի մասնակիցներին, Ալիևան պնդել է՝ այդ պատերազմը «ցույց տվեց, որ Ադրբեջանը երբեք չի համակերպվի իր տարածքների կորստյան հետ»:

Պաշտոնական Բաքուն նաև արտգործնախարարի ու պաշտպանության նախարարի մակարդակներով է անդրադառնում Տոնոյանի հայտարարություններին:
Պաշտոնական Բաքուն ղարաբաղյան խնդրի շուրջ բանակցություններում պատրաստ է քննարկել ցանկացած առաջարկ, որը կտեղավորվի Ադրբեջանի տարածքային ամբողջականության շրջանակներում, Բրյուսելում հայտարարել է արտգործնախարար Էլմար Մամեդյարովը: Վերջինս նշել է, որ Հայաստանի վարչապետի ու Ադրբեջանի նախագահի միջև անցած շաբաթ Վիեննայում կայացած հանդիպմանը քննարկվել են մարդասիրական բնույթի հարցեր: «Այդ ուղղությամբ մենք կարող ենք գտնել շփման եզրեր», - ասել է Մամեդյարովը:

Ադրբեջանի արտգործնախարարը միաժամանակ տարակուսանք է հայտնել այդ հանդիպումից մի քանի ժամ անց Հայաստանի պաշտպանության նախարարի՝ Նյու Յորքում արած հայտարարության կապակցությամբ: «Մի կողմից շատ դրական հայտարարություններ են հնչում, մյուս կողմից՝ անհեթեթություն, որ նոր Բարդություններ է ստեղծում: Սա այն հարցերից մեկն է, որի շուրջ պետք է աշխատանք տանել: Հայաստանում պետք է հասկանան, որ բռնակցման քաղաքականությունն ու տարածքների օկուպացիան անհնար է կապակցել միջազգային հարաբերությունների հետ», - ասել էր Մամեդյարովը:

Դե իսկ Ադրբեջանի Պաշտպանության նախարարի մեկնաբանություններն անցնում են կոռեկտության սահմանները:

Տպավորություն է ստեղծվում, որ Բաքուն հստակ անցել է հայկական կողմին «հաթաթաներ տալու» ռեժիմի: Այս պայմաններում ինչպե՞ս են կողմերը բանակցելու, ինչի՞ շուրջ են բանակցելու, երբ խոստանում են Արցախում Ադրբեջանի դրոշ ծածանել: Իսկ դիվանագիտական դաշտում էլ ակնարկում են, թե բանակցություններում պատրաստ են Հայաստանի հետ քննարկել ցանկացած առաջարկ, որը կտեղավորվի Ադրբեջանի տարածքային ամբողջականության շրջանակներում...
Իրականում բանակցային գործընթացը փակուղում մեջ է, որքան էլ կողմերը հայտարարեն, թե պատրաստ են շարունակել հանդիպումները:

Թամար Բագրատունի