ՊՎԾ ազատ արձակված աշխատակիցը պատմել է, որ գործել են Դավիթ Սանասարյանի գիտությամբ

Պետական վերահսկողական ծառայության գնումների գործընթացի վերահսկողական վարչության գլխավոր մասնագետ Գևորգ Խաչատրյանը, որը ձերբակալվել էր Ազգային անվտանգության ծառայության կողմից, այնուհետև՝ կալանավորվել, այսօր ազատ է արձակվել:

ԱԱԾ լրատվական ծառայության ղեկավար Սամսոն Գալստյանի խոսքով՝ նրա նկատմամբ կալանքը փոխարինվել է չհեռանալու մասին ստորագրությամբ:

Aysor.am-ի տեղեկություններով, Գևորգ Խաչատրյանը գործարքի է գնացել նախաքննական մարմնի մարմնի հետ, ընդունել, որ կատարվել են անօրինական գործողություններ և պատմել, որ գործել են Պետական վերահսկողական ծառայության պետ Դավիթ Սանասարյանի գիտությամբ:

Հիշեցնենք, որ բուժհիմնարկներին դիալիզի սարքեր մատակարորող «Ֆրիզանյուզ» ընկերության ղեկավարը հայտարարել էր, որ Պետական վերահսկողության ծառայության աշխատակիցները ծառայության ղեկավար Դավիթ Սանասարյանի գիտությամբ մի շարք փոփոխություններ են մտցրել գնումների գործընթացում, որի արդյունքում մրցույթում հաղթել է կահույք ներկրող «Զորաշեն» ընկերությունը, որը, ըստ տեղեկությունների, վերահասկողության ծառայության աշխատակիցների հետ է կապված: Այդ հայտարարության հիման վրա Առողջապահության նախարարը նյութեր էր ուղարկել ԱԱԾ:

Գործով ձերբակալվել, այնուհետև կալանավորվել էին Պետական վերահսկողական ծառայության գնումների վերահսկողության վարչության պետ Սամվել Ադյանը և նույն վարչության գլխավոր մասնագետ Գևորգ Խաչատրյանը:

Նշենք նաև, որ լրագրողների հետ զրույցում Դավիթ Սանասարյանը հայտարարել էր, որ Սամվել Ադյանն ու Գևորգ Խաչատրյանը ՊՎԾ օրինակելի ու լավագույն աշխատակիցներից են։
115