Ո՞ւմ է բաժին հասնելու Բաղդասարովի գործարանը, ով է դառնալու արտոնյալ

Ազգային ժողովը քննարկում է «Հրազդան ցեմենտ» ընկերությանը հարկային արտոնություններ տրամադրելու հարցը: Էկոնոմիկայի նախարար Արծվիկ Մինասյանն ԱԺ նիստում ասաց, որ գործարանը՝ սկսած ճգնաժամային տարիներից, ինչ-որ տեղ նաև ոչ բավարար մենեջմենթի պատճառով, կուտակել է մեծածավալ հարկային պարտավորություններ, ինչը հանգեցրել էր նրան, որ գործարանին տրված վարկային պարտավորությունների ապահովման միջոց հանդիսացող ձեռնարկության ամբողջ գույքը և բաժնեմասերը գրավադրվել են ՎՏԲ Հայաստան բանկում: Ձեռնարկությունը գնում է սնանկացման ու լուծարման: Ընկերությունը , մասնավորապես, կազատվի 2016 թ. փետրվարի 1-ի դրությամբ հաշվարկված, բայց չվճարված հարկային և պարտադիր սոցիալական ապահովագրության գծով առաջացած տույժերից` 510 մլն 125 հազար դրամ ընդհանուր գումարի չափով: Մինասյանը տեղեկացրեց, որ դեռևս մեկ տարի առաջ վարչապետի հանձնարարությամբ ստեղծվել էր խումբ, որպեսզի ուսումնասիրվի խնդիրը, քանի որ կարևորվում է ձեռնարկության դերը ՀՀ տնտեսությունում: Արդյունքում ներկայացվում է այս նախագիծը, որպեզի «Հրազդան ցեմենտ» ընկերության նկատմամբ հարշվարկված, բայց չվճարված հարկային պարտավորությունների ու պարտադիր սոցիալական ապահովության վճարների գծով առաջացած տույժերը, ոչ թե մայր գումարը, զիջվում է, որպեսզի հնարավորություն տրվի շարունակելու գործարանի բնական գործունեությունը: Հիշեցնենք, որ «Հրազդան-ցեմենտ» գործարանի նախկին սեփականատերը Միկա Բաղդասարովն էր, որին պատկանող «Արմավիա» ավիաընկերությունը նույնպես սնանկացավ, փակվեցին նաև Բաղդասարովի բենզալցակայաններն ու մյուս բիզնեսները: Պատգամավոր Հեղինե Բիշարյանի հարցին, թե ո՞վ է լինելու ձեռնարկության նոր սեփականատերը և ո՞ւմ համար է կառավարությունը նման արտոնություն սահմանում, Արծվիկ Մինասյանը պատասխանեց, որ փաստացի սեփականատերը ՎՏԲ Հայաստան բանկն է, որին անցել է բաժնետոմսերի նկատմամբ սեփականության իրավունքը: Հեղինե Բիշարյանը հարցրեց, թե ինչո՞ւ է տարանջատվում «Հրազդան ցեմենտ» գործարանը՝ տույժերը ներելու առումով, եթե կան բազմաթիվ բարեխիղճ գործարարներ, որոնք հայտնվել են նմանատիպ վիճակում, բայց նրանց նկատմամբ արտոնություններ չեն կիրառվել: «Ինչո՞ւ մենք պետք է գործարանի սեփականատիրոջը այդ լավությունն անենք, ո՞վ է այդ անձը»,- հարցրեց պատգամավորը:«Մենք որևէ անձի լավություն չենք անում, հնարավորություն ենք տալիս ապահովել 470 աշխատատեղ ու ապահովել գործարանի աշխատանքի շարունակականությունը: Սա մեր կողմից սիմվոլիկ քայլ է, որպեսզի նոր սեփականատերը՝ բանկը, կարողանա առաջ մղել ձեռնարկության գործունեությունը»,- պատասխանեց նախարարը: Եթե այս նախագիծը չընդունվի, ըստ Արծվիկ Մինասյանի, Հրազդանի ցեմենտի գործարանը կլուծարվի, իսկ գույքը կվաճառվի: Նա հստակեցրեց, որ սրանով բանկին չի տրվում այս արտոնություն, այլ Հրազդան ցեմենտ ձենարկությանը՝ որպես առանձին իրավաբանական սուբյեկտ: Այս օժանդակությունը ըստ նրա հասեցական է և ուղղված է ոլորտին` մեր տնտեսության ներուժը բարձրացնելու նպատակով:Բիշարյանը հորդորեց սրտաճմլիկ ելույթներ չունենալ, քանի որ երբ պատվեր ունի, այդ գործարանն աշխատում է: Իհարկե, հիմա գործարանի գույքը բանկում է գրավադրված, բայց չի բացառվում, որ այս արտոնությունից հետո գործարանը ձեռք գցի ինչ-որ մի գործարար եւ այս արտոնություններն ըստ էության ստանա հենց նա: Անի Սահակյան