Յուրաքանչյուր պարզաբանում հերթական «լոլոներն» է եղել. Սոֆյա Հովսեփյանը բացահայտում է Անանյանի համակուրսեցուն
ԱԺ «Իմ քայլը» խմբակցության պատգամավոր Սոֆյա Հովսեփյանն ԱԺ ամբիոնից անդրադառնալով ՊԵԿ-ում աշխատանքի ընդունման համար մրցույթների հետ կապված բողոքներին, նշեց, որ բազմաթիվ բողոքներ է ստացել, որոնցից մեկը ստիպված է հրապարակել։
«Այս ելույթս կարող է հնչի, որ Սոֆիա Հովսեփյանը դեռ քաղաքացիական ակտիվության վիճակից դուրս չի եկել, բայց, քավ լիցի, ժամանակ առ ժամանակ ստիպված եմ վերադառնալ։ Օրեր շարունակ անընդհատ ստանալով դիմումներ նույն ոլորտին վերաբերող և անընդհատ բողոքներ նույն պահանջով, ստիպված եմ լինում բողոքներից մեկը հրապարակել, որը վերաբերում է ՊԵԿ-ում մրցույթներին և որը կարծես թե անցկացվում է նորմավորված ձևով, սակայն Շիրակի մարզում նշանակումները կրկին լինում են ծանոթ-բարեկամի միջոցով։ Ստացել եմ մեկ նամակ, որը ստիպված եմ հրապարակել։
Արմեն Հակոբյան, որին Շիրակի մարզում ճանաչում են որպես Օպերի Արմեն, որը եղել է հարկայինի նախկին աշխատող, աշխատանքի ընթացքում ձեռք է բերել մեծ բիզնեսներ, և այդ բիզնեսների ժամանակ իրեն բացարձակ ճանաչել են և ճանաչում եմ որպես հարկերից խուսափող հարկայինի աշխատող։ Եվ այս մարդը այսօր՝ 2019 թվականին, նորից Շիրակի մարզում օպերի պետ է նշանակվել, ով որ հենց Դավիթ Անանյանի համակուրսեցին է։ Ես դիմումով դիմել եմ ՊԵԿ-ին ՝ պարզաբանում ստանալու, և յուրաքանչյուր պարզաբանում հերթական «լոլոներն » է եղել, թե ընթացակարգով է տեղի ունեցել, ինչը ինձ ստիպեց այսօր այս նամակը հրապարակելու և պարոն Անանյանին տեղեկացնելու, որ եթե վստահելի անձի է նշանակել օպերի պետ, ապա բացարձակ վստահելի չէ»,- նշեց պատգամավորը։
Ըստ նրա, եթե Դավիթ Անանյանը վստահ է, որ վստահելի մարդու է նշանակել օպերի պետ, ապա պետք է իմանա, որ նա բացարձակ վստահելի չէ։
««Օպերի Արմենը» նշանակումներ է անում ոչ թե մրցութային կարգով, այլ նրան, որին համարում է իր վստահելին։ Տեղի է ունենում մի վիճակ, երբ հունվարին մրցույթը հաղթահարում են անձինք, սակայն նրանցից որևէ մեկը չի նշանակվում, փոխարենը՝ նշանակվում են պատահական անձինք, որոնք հենց այդ մարդու «դաբրոյով» են հասել այնտեղ։ Շատ ցավալի է, որ մենք գնում ենք երկրի բարելավման, բայց այս ոլորտում նշանակում ենք պատահական անձանց, որոնք ուղղակիորեն կծառայեն «օպերի Արմենին», սա մեզ համար լուրջ խնդիր է: Ուղղակի կոչ եմ անում պարոն Անանյանին, եթե տեղյակ չէ, ապա ուշադիր լինի և տեղեկանա, թե ինչ է կատարվում Շիրակի մարզում, իսկ եթե տեղյակ է, ապա խորհուրդ եմ տալիս վերջ դնել, որովհետև այլևս մենք այլ իրականության մեջ ենք»»,- եզրափակեց պատգամավորը։
Հետևեք մեզ Viber-ում
