Քասախի ավագանու անդամը հացադուլ է սկսել

Արդեն մի քանի օր է,  Կոտայքի մարզի Քասախ համայնքի ավագանու անդամ Արթուր Մարդանյանը հացադուլ է սկսել :Վերջինս պահանջում է  համայնքի ղեկավար Արա Մկրտչյանի պաշտոնական լիազորությունների դադարեցում:  Մարդանյանը նշել է, որ հացադուլն անժամկետ է: «Համայնքում ստուգումներ են կատարվել և խախտումներ են արձանագրվել: Այդ արձանագրված խախտումներին ընթացք չի տրվել, չնայած, որ գյուղապետի վրա կա հարուցված քրեական գործ: Գյուղապետն իր լիազորություններն օգտագործում է այդ քրեական գործի վրա ազդելու համար, և ես այս հացադուլով պահանջում եմ, որ գոնե մինչև քրեական գործի ավարտն իր լիազորությունները դադարեցվեն: Հացադուլը սկսել եմ մարտի 15-ին, ժամը 10-ին»,- ասում է Մարդանյանը: Մարդանյանի խոսքով՝ համայնքի ավագանու 11 անդամներից 6-ը կողմ են գյուղապետի հրաժարականի պահանջին, սակայն գյուղապետին անվստահություն հայտնելու իրավական գործընթաց օրենքով նախատեսված չէ: Վերջինս մի քանի օր առաջ մամուլի ասուլիսի ժամանակ ներկայացրելէ  իր պահանջները և տեղեկացրել,որ պատրաստվում է հացադուլի: Արա Մկրտչյանը Քասախ համայնքի ղեկավարի պաշտոնը զբաղեցնում է 1996թ.-ից: 1991-1996թթ. եղել է Քասախ գյուղական խորհրդի նախագահ: