Ինչքանի դիմաց է Սամվել Ալեքսանյանն անպատիժ մնում

Հեռուստամեկնաբան Համլետ Ղուշչյանի սկանդալայն հարցազրույցից օրեր են անցել, բայց իրավական որեւէ գործընթաց չկա հայտնի օլիգարխ Սամվել Ալեքսանյանի նկատմամբ: Հեռուստամեկնաբանի հայտարարությունը, իրապես, հաղորդում էր հանցագործության մասին, սակայն արի ու տես, ամեն ինչ խաղաղ է մեր լեռների պես: Համլետ Ղուշչյանն ասել էր, որ գործարար Սամվել Ալեքսանյանը գիշերով իրեն առևանգել, տարել է և ատրճանակը գլխին պահելով՝ ասել է՝ կասես էն, ինչ քեզ կասենք. «Ես էդ բոլորի միջով անցել եմ, ես մահվան աչքերին եմ նայել, ասել եմ՝ կրակի, արա՛, որ բերել ես՝ կրակի՛, որովհետև հետո Աստված քեզ պատժելու է, թե ոչ մեկն էլ չպատժի»։ Իրավական ցանկացած պետությունում սկանդալային այսպիսի հայտարարությանը անմիջապես կհաջորդեին գործողություններ, իսկ ինչ է լինում մեզ մոտ, իհարկե, այս հայտարարությունից հետո կառավարությունը որոշեց հերթական արտոնությունը տալ գործարարին պատկանող տեքստիլ ընկերությանը: Կարելի է եզրակացնել, որ Սամվել Ալեքսանյանը այնքան <<կռուպնի>> է մուծվել, որ կարող է ամեն ինչ անել ու ջրից չոր դուրս գալ: Ավելորդ չէ հիշեցնել, որ թավշյա հեղափոխությունից հետո նախկինների համար մուծվելը դարձել է փրկողակ, որքան շատ են տալիս, այնքան ապահով են ապրում: Կոնկրետ Ալեքսանյանի դեպքում ասում են, որ տալիս է անվերջ ,երբ իրենից պահանջում են: Հարկ ենք համարում հիշեցնել, որ միայն Սաշիկ Սարգսյանի գումարների մասին է, որ հայտարարվել է, թե գնում է պետբյուջե: Ինչևէ, վերադառնալով Ալեքսանյանին, նշենք, որ մինչեւ Համլետ Ղուշչյանի հայտարարությունը գործարարին պատասխանատվության ենթարկելու բազում պատճառներ կան: Հիշատակենք միայն մեկը, որի մասին ժամանակին թմբկահարում էր նաեւ ընդդիմադիր Նիկոլ Փաշինյանը:Մի քանի տարի առաջ, երբ սպանվեց Սամվել Ալեքսանյանի նախկին աշխատակից Արմեն Իսրայելյանը՝ Ձկնկուլը, թեման շնորհիվ Նիկոլ Փաշինյանի՝ բուռն քննարկման առիթ դարձավ: Մինչև սպանվելը ,Ձկնկուլը Փաշինյանի կայքին հայտնել էր՝ եթե իր հետ բան պատահի, մեղավորը Ալեքսանյանն է լինելու, ապա պատահեց անդառնալին՝ Մոսկվայում սպանվեցին Ձկնկուլը և Էդուարդ Նշանյանը, մականունը՝ Ճուտ: Սպանությունից հետո, այն ժամանակ դեռևս ԱԺ պատգամավոր Նիկոլ Փաշինյանը ԱԺ նիստի ժամանակ հայտարարեց, որ Արմեն Իսրայելյանի սպանության հետքերը բերում են Ազգային ժողով՝ ակնարկելով Սամվել Ալեքսանյանին: Այն ժամանակ Նիկոլ Փաշինյանը մեղադրում էր իրավապահ մարմիններին: Իսկ ի՞նչ փոխվեց հեղափոխությունից հետո: Ճիշտ նույնը, ինչ Սերժ Սարգսյանի ժամանակ: Հետաքրքիր է, որ Փաշինյանը դեռեւս խոսում է անցումային արդարադատության եւ այլնի մասին, մեկը լինի հենց իր վրա տարածի այդ արդարադատությունը պարզելու համար, թե ով ինչքանի դիմաց է ցայսօր ազատ ման գալիս: Անի Սահակյան