Բաքուն սպառնալով «այրում է կամուրջները»
ԵԱՀԿ գործող նախագահ Միրոսլավ Լայչակի հետ հանդիպումից հետո տեղի ունեցած մամուլի ասուլիսի ժամանակ երեկ Ադրբեջանի ԱԳՆ ղեկավար Էլմար Մամեդյարովը հայտարարել է, որ ԵԱՀԿ Մինսկի խմբի ռուսաստանցի համանախագահ Իգոր Պոպովի հետ հեռախոսազրույցի ընթացքում քննարկել է ղարաբաղյան հակամարտության կարգավորման վերաբերյալ Հայաստանի ղեկավարության հայտարարությունները: «Հայաստանի ղեկավարության վերջին հայտարարություններն ուղղված չեն խաղաղությանը: Օրինակ, Ազգային անվտանգության ծառայության ղեկավարի վերջին հայտարարությունը: Ես խոսել եմ այդ հարցի շուրջ այսօր հեռախոսազրույցի ժամանակ ԵԱՀԿ Մինսկի խմբի ռուսաստանցի համանախագահի հետ», - ասել է Մամեդյարովը: Արցախ կատարած այցի ընթացքում ՀՀ Ազգային անվտանգության ծառայության տնօրեն Արթուր Վանեցյանը հայտարարել էր, որ մեր հողերում պետք է բնակվեն մեր հայրենակիցները և շենացնեն մեր երկիրը, և որ՝ «մենք հստակ ուղերձ ենք տալու ողջ հայ ժողովրդին և ողջ աշխարհին, որ մենք ոչ մի թիզ հող հետ հանձնելու նպատակ չունենք, այլ ընդհակառակը, մեր հողերում պետք է բնակվեն մեր հայրենակիցները և շենացնեն մեր երկիրը»։ Ահա, Բաքուն պաշտոնապես, արձագանքնեց ՀՀ ԱԱԾ ղեկավարի հայտարարությանը: Կարելի է ասել, որ դա բողոքի ձայն է՝ երկրորդ կողմի հետ հանդիպման ընթացքում: Ադրբեջանի իշխանությունները որոշել են բավական բարձր մակարդակով արձագանքել: Մամեդյարովը տեղեկացրել է, որ եվրոպացի գործընկերոջը ներկայացրել է Բաքվի դիրքորոշումը: Իսկ Լայչակը հաջորդ շաբաթ այցելելու է Երևան՝ Հայաստանի իշխանությունների հետ հակամարտության կարգավորման հարցերը քննարկելու նպատակով: Փաստորեն, Ադրբեջանի արտաքին գործերի նախարարը Լայչակին խնդրել է Երևան կատարելիք այցի ժամանակ Հայաստանի ղեկավարությունից պարզել, թե իրավիճակի ինչպիսի զարգացման պետք է նախապատրաստվել: «Մենք մեր ժողովրդին խաղաղության նախապատրաստե՞նք, թե՞ այլ ուղղությամբ»: «Կան մի շարք գաղափարներ, որոնք ես հաջորդ շաբաթ կներկայացնեմ Երևանում», - իր հերթին ասել է Մ.Լայչակը: Հիշեցնենք, որ ՀՀ վարչապետ Նիկոլ Փաշինյանը որոշ նրբերանգներով հայտարարություն էր արել, որ հայկական կողմն էլ ներկայացրել է իր տեսլականը միջնորդների միջոցով ադրբեջանական կողմին։ Հիմա, պաշտոնական Բաքուն, կարծես, «կամուրջներն այրելու» նախազգուշացում է անում՝ «բանակցո՞ւմ եք», թե՞ «պատերազմ»… Իհարկե, «բանակցել», «խաղաղության նախապատրաստվել» ասելով Ադրբեջանը նկատի ունի հայկական կողմից միակողմանի զիջումներ, այսինքն, ինչպես իրենք են ասում՝ «տարածքների վերադարձ»: Ամեն դեպքում, լարման, պայթյունավտանգ իրավիճակի ենք մոտենում: Մետաքսյա Շալունց
Հետևեք մեզ Viber-ում
