2 պաշտոնյայի լիազորությունները դադարեցվել են
Շիրակի մարզպետարանում 2 պաշտոնյայի լիազորությունները դադարեցվել են: Խոսքը Քաղաքաշինության վարչության պետի տեղակալ Լեոնիդ Դավթյանի և նույն վարչության ճարտարապետաշինարարական բաժնի պետ Էդիկ Սիմոնյանի մասին է: Նրանց աշխատանքային լիազորությունները դադարեցնելու որոշումը պայմանավորված է «Քաղաքացիական ծառայության մասին» ՀՀ օրենքի 37-րդ հոդվածի 2-րդ մասի 11-րդ կետի դրույթով՝ այն է քաղաքացիական ծառայության պաշտոն զբաղեցնելու՝ սույն օրենքով սահմանված առավելագույն տարիքը լրանալը: Այդ տարիքը սահմանված է 66 տարին. «Ես ոչ թե ազատվել եմ աշխատանքից, այլ դադարեցվել են իմ լիազորությունները: Իմ լիազորությունների դադարեցումը տեղի է ունեցել 2019 թվականի հունվարի 16-ին՝ քաղաքացիական ծառայության պաշտոն զբաղեցնելու առավելագույն տարիքը լրանալու կապակցությամբ, և դա բոլորովին կապ չունի մարզպետարաններում նախատեսվող կառուցվածքային փոփոխությունների հետ»,- ասել է Շիրակի մարզպետարանի քաղաքաշինության վարչության պետի նախկին տեղակալ Լեոնիդ Դավթյանը: Նշենք, որ վարչության պետի տեղակալի և ճարտարապետաշինարարական բաժնի պետի պաշտոններն այժմ թափուր են:
Հետևեք մեզ Viber-ում
