ԱՄՆ կոնգրեսականները հանդես են եկել ԼՂՀ-ում Ադրբեջանի հարձակումները դատապարտող հայտարարություններով

ԱՄՆ կոնգրեսականները հանդես են եկել Լեռնային Ղարաբաղի հետ սահմանին Ադրբեջանի լայնամասշտաբ հարձակումները դատապարտող հայտարարություններով` կոչ անելով ԱՄՆ կառավարությանը և միջազգային  միջնորդներին պատասխանատվության կոնչել Ադրբեջանին և զրոյացնել Ալիևի ռեժիմին  հատկացվող ֆինանսական օգնությունը: Այս մասին հաղորդում է Ամերիկայի Հայ դատի գրասենյակը: Կոնգրեսի` հայկական հարցերով  հանձնախմբի համանախագահներ Ֆրենք Փալոնեն և Ռոբերտ Դոլդը, ինչպես նաև ԱՄՆ Ներկայացուցիչների պալատի անդամներ Ադամ Շիֆը և Բրեդ Շերմանը Ադրբեջանի նախաձեռնած հարձակումներից ժամեր անց հանդես են եկել դատապարտող խոսքով: «Խստորեն դատապարտում եմ Ադրբեջանի կողմից Լեռնային Ղարաբաղի դեմ ուղղված ռազմական գործողությունների սրումը և միանում եմ Օբամայի վարչակազմի կոչին՝ անհապաղ թուլացնել լարվածությունը», - ասել է Փալոնեն: «Մեկ անգամ ևս համոզվեցինք, որ Ադրբեջանը շարունակում է ասել մեկ բան, անել հակառակը: Հուսով եմ, որ Օբամայի վարչակազմը կշարունակի   աշխատել Լեռնային Ղարաբաղի և ԵԱՀԿ Մինսկի խմբի հետ` խաղաղ լուծում գտնելու համար, իսկ Ադրբեջանը պատասխանատվություն կկրի իր գործողությունների համար», ասել է հանրապետական Դոլդը: «Խորապես մտահոգված եմ և քննադատում եմ Ադրբեջանի ագրեսիայի այս նոր սրացումն ընդդեմ Լեռնային Ղարաբաղի: Հաշվի առնելով, որ դա տեղի է ունեցել ԱՄՆ փոխնախագահ Ջո Բայդենի և պետքարտուղար Ջոն Քերիի հետ Իլհամ Ալիևի  հանդիպումից օրեր անց` հասկանալի է, որ ԱՄՆ-ի և Մինսկի խմբի քաղաքականությունը պարզապես չի աշխատում: Քանի դեռ Ադրբեջանը ուժգին ու բովանդակալից հետևանքներ չի ստացել իրավիճակը սրելու ու բռնության իր քաղաքականության համար,   փոքր է հնարավորությունը, որ հակամարտությունը կլուծվի և հետագա արյունահեղությունները կխուսափվեն», - ասել է Շիֆը: Բրեդ Շերմանը   Ադրբեջանի հարձակումները «խորապես հիասթափեցնող» է անվանել` դատապարտելով բռնությունն ու առաջարկելով, որ «ԱՄՆ-ի ֆինօգնությունը Ադրբեջանին պետք է դադարեցվի, քանի դեռ ագրեսիան չի դադարել»: