ՊՊԾ գնդի գրավման օրը ո՞վ է կրակել օպերատորին
«ՊՊԾ գնդի գրավման օրը, առավոտյան ժամը 7։30-ի սահմաններում ՊՊԾ գնդի մոտ նկարահանում էի իրականացնում։ Ոստիկանության Էրեբունու բաժնի կողմից հեռվից նկարահանում էի պրոցեսը, երբ զրահամեքենան փորձեց մտնել գունդ։ Այս ժամանակ կրակոցներ հնչեցին և ես վիրավորվեցի:Այդ պահին գնդի մոտ էին Մարտիրոս Հակոբյանն ու Թաթուլ Թամրազյանը»,-«Սասնա ծռեր» խմբի 10 անդամների գործով դատավարությանը ցուցմունք է տվել ՊՊԾ գնդի գրավման օրը տարածքում տեսանկարահանում իրականացնող ոստիկանության նախկին օպերատոր Ռոբերտ Հայրապետյանը: Հարցին, թե, ըստ նրա, այդ երկուսից ով է կրակել իր վրա, տուժողը պատասխանել է. «Մինչ այդ Մարտիրոս Հակոբյանն ագրեսիվ վարք էր ցույց տալիս, մի քանի անգամ օդ էր կրակում։ Կրակոցից հետո աջ ձեռքի հատվածում ստացա վնասվածք, շտապօգնության մեքենան մոտիկ էր, միանգամից տեղափոխեցին «Էրեբունի» ԲԿ»: Ամբաստանյալ Արեգ Կյուրեղյանը հետաքրրքվել է՝ արդյոք տեսանյութի կադրերում երևո՞ւմ է՝ ով է կրակոցներ արձակողը, պատասխանել է, որ լավ չի երևում: Ա. Կյուրեղյանը հայտարարել է, որ այդ տեսանյութը կրճատված է ներկայացվել։ Ռոբերտ Հայրապետյանը նշել է, որ դեմ է «Սասնա ծռեր»-ի անդամների նկատմամբ համաներման կիրառմանը:
Հետևեք մեզ Viber-ում
