Մերձավանի բնակիչ, հանցավոր աշխարհում հայտնի «Հունաստանի Կարենին» փորձել են սպանել միաժամանակ երկու տարբեր խմբեր

Մերձավանի բնակիչ Կարեն Խնուսյանին, ով հանցավոր աշխարհում հայտնի է որպես «Հունաստանի Կարեն»  փորձել են սպանել միանգամից երկու տարբեր խմբեր. Նախապատրաստողները հայտնաբերվել են, իրականացնողները՝ ոչ։ «Փաստինֆո»-ն ավելի վաղ տեղեկացրել է, որ 2019 թվականի փետրվարի 24-ին Կոտայքի մարզի Ջրվեժ գյուղի առաջին դաշտում հայտնաբերվել է արական սեռի դի` կրծքավանդակի աջ և ձախ կեսի կողմնային մակերեսներին և աջ բազկի ստորին երրորդականի հետին մակերեսին հրազենային վնասվածքներով: Դեպքի առթիվ ՀՀ ՔԿ Աբովյանի քննչական բաժնում  հարուցած քրեական գործով ձեռնարկված քննչական և օպերատիվ-հետախուզական միջոցառումների արդյունքում պարզվել է դիակի ինքնությունը, վերջինս Մերձավանի  Կարեն Խնուսյանն է։ Քննչական կոմիտեի տարածած պաշտոնական հաղորդագրության համաձայն՝ սպանությունը դեռ չի բացահայտվել,  հայտնի չէ  կատարողի ինքնությունը, սակայն քննությամբ պարպզվել է, որ Խնուսյանին սպանելու մտադրություն են ունեցել նաեւ այլոք։ «Տվյալներ են  ձեռք բերվել առ այն, որ Վանաձոր քաղաքի բնակիչը՝ ծնված 1984թ., և Իջևան քաղաքի բնակիչը՝ ծնված 1989թ., նախնական համաձայնություն են ձեռք բերել 1990թ. ծնված երիտասարդին սպանելու շուրջ (Կ.Խնուսյանին-խմբ.): Իրենց հանցավոր մտադրությունն իրականացնելու նպատակով 2019 թվականի հունվար և փետրվար ամիսներին 29 և 34-ամյա տղամարդիկ կատարել են սպանությանն ուղղված նախապատրաստական գործողություններ: Վերջիններս,  պարբերաբար այցելելով 28-ամյա երիտասարդի բնակության վայր, փորձել են ճշտել սպանությունն իրականացնելու հնարավոր եղանակները, նրա գտնվելու վայրի և մեքենա վարելու մասին հանգամանքները»,- հայտնում են ՀՀ քննչական կոմիտեից: Նույն աղբյուրի համաձայան՝  2019 թվականի փետրվար ամսին նշված անձինք ապօրինի կերպով ձեռք են բերել, պահել և կրել գործարանային արտադրության ակոսափող հրազեն հանդիսացող «CZ 27» մոդելի 7,65 մմ տրամաչափի ատրճանակ և ռազմամթերք հանդիսացող 3 հատ 7,65 մմ տրամաչափի ռազմամթերք հանդիսացող  փամփուշտներ: Սակայն իրենց կամքից անկախ հանգամանքներում հանցագործությունն ավարտին չեն հասցրել, քանի որ 1990թ. ծնված երիտասարդը սպանվել է։ Ասել է թե՝ այս պահի դրությամբ դեռեւս պարզ չէ, թե որքանով նախապատրաստողները կապ ունեն կատարված սպանության հետ։ Գործարանային արտադրության ակոսափող հրազեն հանդիսացող «CZ 27» մոդելի 7,65 մմ տրամաչափի ատրճանակը և ռազմամթերք հանդիսացող 3 հատ 7,65 մմ տրամաչափի ռազմամթերք հանդիսացող փամփուշտները 2019 թվականի փետրվարի 27-ին հայտնաբերվել են Արարատի մարզի Գեղանիստ գյուղի տներից մեկում կատարված խուզարկությամբ: Աբովյանի քննչական բաժնում հարուցվել է նոր քրեական գործ՝ ՀՀ քրեական օրենսգրքի 35-104-րդ հոդվածի 2-րդ մասի 7-րդ կետով և 235-րդ հոդվածի 2-րդ մասով, որը միացվել է 28-ամյա երիտասարդի սպանության դեպքի առթիվ հարուցված քրեական գործին: Ձեռք բերված ապացույցների համակցությամբ՝ Վանաձոր քաղաքի 34-ամյա բնակչին և Իջևան քաղաքի 29-ամյա բնակչին մեղադրանք է առաջադրվել՝ ՀՀ  քրեական օրենսգրքի 35-104-րդ հոդվածի 2-րդ մասի 7-րդ կետով և 235-րդ հոդվածի 2-րդ մասով: Նրանց նկատմամբ որպես խափանման միջոց է կիրառվել կալանավորումը: Նշենք, որ սպանվածը՝  քրեական հեղինակություն «Հունաստանի Կարենը»  որպես մեղադրյալ էր անցնում Հայաստանի պետական սահմանը կեղծ անձնագրով հատելու համար։ «Դատալեքս» դատական-տեղեկատվական համակարգից տեղեկացանք, որ Կարեն Խնուսյանը մեղադրվում էր ՀՀ քրեական օրենսգրքի 329-րդ հոդվածի 1-ին մասով՝ պետական սահմանն ապօրինի հատելը։ Ըստ նախաքննական մարմնի՝   նա ձեռք էր բերել պաշտոնական փաստաթուղթ հանդիսացող, իր լուսանկարով, սակայն եղբոր` 03.09.1989թ. անվամբ ակնհայտ կեղծ փաստաթուղթ՝ անձնագիր եւ այն օգտագործելով՝ 2016 թվականի ապրիլի 20-ին` ժամը 00:13-ին, ՀՀ «Զվարթնոց» սահմանային անցակետով ապօրինի հատել ՀՀ պահպանվող պետական սահմանը` մուտք գործելով ՀՀ տարածք: Գործն այժմ դատաքննության փուլում է։ Քրեական գործը դատարանի վարույթում է գտնվում դեռեւս 2018 թվականի օգոստոսից։ Այս պարզ գործով անգամ 6 ամիսը բավարար չի եղել դատարանին՝ դատաքննությունն ավարտելու համար։ Նշենք, որ նա հետախուզվում էր նաեւ Ինտերպոլի կողմից։ Հունաստանի Սալոնիկ քաղաքի դատարանը 2015թ. նրան դատապարտել էր 57 տարի և 6 ամիս ազատազրկման՝  անձի առևանգման, սպանության, ապօրինի զենք կրելու և կողոպուտ կատարելու համար։ Մեկ տարի անց՝ 2016թ. ապրիլին,  նրան 6 օրով արձակուրդ են տրամադրել, որից հետո նա չի վերադարձել  քրեակատարողական հիմնարկ եւ նա շարունակել է տեղաշարժվել կեղծ անձնագրով՝ օգտագործելով եղբոր տվյալները։ Արդեն իսկ շրջանառվող տեղեկությունների համաձայն՝ կատարողներին փնտրում են նաեւ Խնուսյանի կողմնակիցները, եւ մեծ է վենդետայի հավանականությունը։