Պուտինն ու Լուկաշենկոն 3 օր բանակցել են.ինչ են պայմանավորվել

Ռուսաստանի և Բելառուսի նախագահներ Վլադիմիր Պուտինն ու Ալեքսանդր Լուկաշենկոն ավարտել են բանակցությունները, որոնք մեկնարկել էին Սոչիում փետրվարի 13-ին, գրում է ТАСС-ը: 3 օր բանակցությունների ընթացքում երկու երկրների առաջնորդները երկկողմ համագործակցության տարբեր հարցեր են քննարկել՝ հասցնելով դահուկ քշել և հոկեյ խաղալ: Եռօրյա բանակցությունների ընթացքում հարկային մանևրի հարցն այդպես էլ չի քննարկվել՝ չնայած նրան, որ այդ հարցով Մինսկի դժգոհությունները դեկտեմբերի 25-ին և 29-ին կայացած նախատոնական հանդիպումների պատճառ դարձան: Լուկաշենկոն նշել է, որ քննարկվել են հումանիտար և սոցիալական ոլորտի թեմաները, երկկողմ հարաբերությունների զարգացման հեռանկարները, այդ թվում նաև պետությունների ղեկավարների փոփոխությունից հետո: Լուկաշենկոն խոստովանել էր, որ իրեն և Ռուսաստանի նախագահ Վլադիմիր Պուտինին մտահոգում է միութենական պետության ճակատագիրը պաշտոններից իրենց հեռանալուց հետո: «Մենք բացահայտ ասել ենք, որ մենք հավերժ չենք, որ ինչ-որ պահի հեռանալու ենք»,- ասել էր Լուկաշենկոն: