«Պատրաստվում ենք ՊԵԿ-ից բացատրություն պահանջել». Մանե Թանդիլյան

2018թ. պետական բյուջեի մուտքերի ապահովման ՊԵԿ-ի կեղծարարության հանգամանքները քննվում են Ազգային ժողովում: Խորհրդարանի «Լուսավոր Հայաստան» խմբակցության պատգամավոր, Ֆինանսավարկային և բյուջետային հարցերի մշտական հանձնաժողովի նախագահ Մանե Թանդիլյանը 168.am-ի հետ զրույցում հայտնեց, որ ուսումնասիրում են օրեր առաջ 168.am-ի հրապարակած հոդվածը: «Պատրաստվում ենք ՊԵԿ-ից բացատրություն պահանջել»,- ասաց նա: Հարցին՝ նման պրակտիկան նո՞ր է, թե՞ նախկինում էլ է կիրառվել, Մ.Թանդիլյանը պատասխանեց. «Նման ահազանգի չեմ հանդիպել»: Հիշեցնենք, որ 2018թ. հարկային եկամուտների հավաքագրման 99.7 % կատարողական ապահովելու համար մի քանի տասնյակ հարկ վճարողների միասնական հաշվին առկա գումարներն ինչ-ինչ հիմքերով (կամ հաշվարկի ճշգրտում կամ ստուգման ակտ, և այլն) մուտքագրվել են բյուջե (ճանաչվել է հարկային եկամուտ)՝ այդ գումարները 2019թ. աոաջին երկու ամիսներին հետ վերադարձնելու պայմանով։ Միայն համեմատաբար խոշոր (100 մլն դրամից ավելի) մուտքագրումների մասով դեկտեմբեր ամսվա այդ օրերին արհեստականորեն եկամուտ է ճանաչվել շուրջ 21.0 մլրդ դրամ։