Սանասարյանը թվերն է հայտնում
ՀՀ պետական վերահսկողական ծառայության ղեկավար Դավիթ Սանասարյանն անդրադառնալով Բժշկական համալսարանում ուսումնասիրություններին՝ նշեց, որ այստեղ մեծ ծավալի մասին է խոսքը, քանի որ Բժշկական համալսարանն ունի նաև կլինիկաներ: Ծառայության պետը նշեց, որ Բժշկական համալսարանի ուսումնասիրությունն, ամենայն հավանականությամբ, կավարտեն մարտի վերջին: «Աջակցություն դատապարտյալներին» հիմնադրամում հայտնաբերված չարաշահումներին ու խնդիրներին անդրադառնալով՝ Սանասարյանը խոստացավ դրանց մասին խոսել ավելի ուշ: Հարցին՝ ուժային մարմիններում ևս կատարվելու են ուսումնասիրություններ, նա պատասխանեց, որ այդ մասին վարչապետի հետ պետք է խոսեն: Լրագրողները հետաքրքրվեցին՝ իսկ նախարարություններում ուսումնասիրություններ ինչո՞ւ չեն անում, Սանասարյանն ասաց. «Այնպես չէ, որ որևէ տեղ լավ է եղել, դրա համար չենք գնացել, ծավալը շատ է, առաջնահերթությունների խնդիր կա, «Սերմերի գործակալություն»-ում ենք սկսել ուսումնասիրություն, «Երիտասարդական հիմնադրամը» ևս ուսումնասիրել ենք, ավարտել, այն ընթացքի մեջ է»: Սանասարյանին հարցրին՝ ընդհանուր առմամբ որքա՞ն գումար է վերադարձվել պետբյուջե: Նա ասաց, որ 2018 -ի և 2019 թ. սկզբի տվյալներով՝ պետբյուջե է վերադարձվել 827 մլն դրամ, ինչը, նրա գնահատմամբ, բավական նորմալ արդյունք է նոր ստեղծված կառույցի համար:
Հետևեք մեզ Viber-ում
