«Փաստաթղթավորված բանակցային հիմքի փոխարեն՝ մենք այսօր ունենք վերելակում ունեցած հանդիպումներ». Քաղաքագետ

Քաղաքագետ Աղասի Ենոքյանն այսօր լրագրողրողների հետ հանդիպմանը նշեց, որ այսօր փաստաթղթավորված բանակցային հիմքի փոխարեն մենք  ունենք վերելակում ունեցած հանդիպումներ: «Արցախի շուրջ ընթացող քննարկումների հետ կապված որոշ փորձագետներ, քաղաքական գործիչներ տագնապ են բարձրացնում, նշում են, թե տեսնում են որոշակի ստորջրյա զարգացումներ, մյուսներն էլ ասում են, թե սա ավելորդ աղմուկ է: Այո՛, հիմա սեղանին չկա ինչ-որ փաստաթուղթ, որտեղ խոսվում է տարածքները զիջելու վերաբերյալ, բայց բժիշկը երբ նայում է հիվանդին՝ զգում է ախտանիշներ, որի հիման վրա որոշում է, թե ի՞նչ է կատարվում: Բավականին վախեցնող հիմք կա, որը ստիպում է Հայաստանում ցանկացած քաղաքական զարգացման զգուշավոր նայել»,- ասաց քաղաքագետը: Աղասի Ենոքյանն ահազանգում է, որ այժմ այլևս չի խոսվում Վիեննայի և Սանկտ Պետերբուրգի պայմանավորվածությունների, Հելսինկյան երեք սկզբունքների մասին: