Կառավարության ծրագիրը հաստատվեց
Կառավարությունն այսօրվա նիստում հաստատեց ծրագիրը: Ծրագիրը կառավարությանը ներկայացրեց ՀՀ փոխվարչապետ Մհեր Գրիգորյանը՝ ասելով, որ մաքսիմալ մշակել են առաջարկները, որոնք ստացել են: «Կարծում եմ՝ ստացանք լավ ծրագիր, ճիշտ կառուցվածքով, սկզբունքներով: Ծրագրի հետ կապված անելիքների գործիքակազմը և թվային ցուցանիշներն արտացոլված կլինեն ոլորտային ծրագրերում, որոնց վրա կսկսենք աշխատել կառավարության ծրագրի հաստատումից հետո»,- ասաց Գրիգորյանը: Կառավարության ծրագրի նախագիծը ներկայացվել էր կառավարության փետրվարի 6-ի նիստում, սակայն այն չէր հաստատվել, քանի որ ստացվել էին նոր առաջարկություններ: Նիկոլ Փաշինյանն էլ ասաց, թե այս ընթացքում եղել են որոշակի արձագանքներ: «Մենք այդ արձագանքերի քննարկումը նախաձեռնեցինք ու դա մեզ օգնեց, որ արձանագրենք՝ կառավարության այս ծրագիրը համապատասխանում է մեր ունեցած հայեցակարգային պատկերացումներին: Մեր հայեցակարգային պատկերացման համար շատ անկյունաքարային նշանակությւոն ունի հետևյալը՝ մենք հռչակել ենք տնտեսական հեղափոխության հայեցակարգը ու մենք ազդարարում ենք տնտեսական հեղափոխության մեկնարկը», - ասաց նա: Նա նշեց, որ շուտով կներկայացնեն նաև կառավարության նոր կառուցվածքի մասին նախագիծը:
Հետևեք մեզ Viber-ում
