Այո, Ռոբերտ Քոչարյանը քաղբանտարկյալ է. ՀՀԿ-ն վերահաստատում է
ՀՀ վերաքննիչ քրեական դատարանը՝ դատավոր Մնացական Հարությունյանի նախագահությամբ, քիչ առաջ մերժեց երկրորդ նախագահ Ռոբերտ Քոչարյանի պաշտպանների բողոքը: Անփոփոխ մնաց կալանքի ժամկետը երկարաձգելու՝ առաջին ատյանի դատարանի որոշումը։ «Էս որոշումը հարյուր տոկոսով քաղաքական բնույթի որոշում է, քաղաքական պատվերի շրջանակներում կայացված։ Իրավաբանությունն էս որոշման մեջ հավասար է զրոյի: Ռոբերտ Քոչարյանը քաղբանտարկյալ է»,- լրագրողների հետ զրույցում պաշտոնապես հայտարարել է ՀՀ երկրորդ նախագահի փաստաբան Հայկ Ալումյանը: Henaran.am-ի խնդրանքով մեկնաբանելով Ռոբերտ Քոչարյանի կալանքի ժամկետը երկարաձգելու Վերաքննիչ դատարանի որոշումը՝՝ ՀՀԿ խոսնակ Էդուարդ Շարմազանովը նշեց. «Ռոբերտ Քոչարյանի դեմ քրեական գործ հարուցելու առաջին իսկ օրվանից Հանրապետական կուսակցությունը դատապարտել է իրավապահ համակարգի գործողությունները: Այդ մասին կուսակցությունը մի քանի անգամ հանդես է եկել դատապարտող հայտարարություններով: Այսօր էլ վերահաստատում ենք մեր դիրքորոշումը, որ երկրորդ նախագահը քաղաքական հետապնդման է ենթարկվում: Ռոբերտ Քոչարյանը քաղաքական բանտարկյալ է: Սա Հայաստանի հանրապետական կուսակցության գործադիր մարմնի, նրա նախագահի, ղեկավարության եւ իմ անձնական տեսակետն է, որը այս ընթացքում որեւէ հանգրվանում չի փոփոխվել»,-ասաց Էդուարդ Շարմազանովը:
Հետևեք մեզ Viber-ում
