Լարված իրավիճակ. «Դու չպիտի ասես՝ ինչ խոսեն, լակոտ». Գևորգ Սաֆարյանը՝ Վալերի Օսիպյանին

«Սասնա ծռեր» խմբի 10 անդամների գործով Հայաստանի ոստիկանապետ Վալերի Օսիպյանի հարցաքննության ժամանակ լարված իրավիճակ ստեղծվեց: Դատավարությանն այսօր ներկա է տուժող, ՀՀ ոստիկանապետ Վալերի Օսիպյանը: Իր ցուցմունքում Օսիպյանը որոշ մանրամասներ  ներկայացրեց ՊՊԾ գնդի գրավման միջադեպից: Նա պատմեց, որ «Սասնա ծռեր»-ի անդամները՝ պատանդ վերցնելով իրեն, սպառնացել են, ինքնաձիգով հարվածել, ուսադիրները պոկել. «Հարվածներով, մտանք գունդ, անցակետով անցանք, ես նկատեցի, որ մի քանի համակագիչներ են սեղանին դրված, այդտեղ աշխատում էր Վարուժան Ավետիսյանը: Ասում էր՝ լավ ենք անում, ռեժիմը մեր կյանքը կերավ»,- ասաց նախկին փոխոստիկանապետը: Մասնավորապես խմբի անդամներից Արեգ Կյուրեղյանը Վալերի Օսիպյանից հետաքրքվեց, թե գնդում գտնվելու ընթացքում իրեն բացատրվե՞լ է, որ սահմանադրական կարգը երկրում տապալված է եւ իրենց գործողությունները ուղղված են այն պահպանելու դեմ, Օսիպյանը պատասխանեց. «Ինձ բացատրել պետք չէ, ես շատերին կարող եմ բացատրել՝ ինչ է սահմանադրական կարգը, բայց սրա շուրջ խոսակցություն եղել է»: Այդ ընթացքում խմբի անդամներից Սմբատ Բարսեղյանը ոստիկանապետին ինչ-որ բան ասաց, որը, սակայն, լսելի չէր ապակիներից այն կողմ գտնվողների համար: Օսիպյանի հարցին, թե բան ունեք ասելու, Սմբատը կրկին ինչ-որ բան ասաց, ինչից հետո Վալերիյ Օսիպյանն ասաց. «Որևէ մեկը չփորձի որեւէ բան ասել»: Գևորգ Սաֆարյանը, որը ներկա էր դատավարությանը, արձագանքեց ոստիկանապետին՝ ասելով. «Դու չպիտի ասես՝ ինչ խոսեն, լակոտ»: Դատավոր Մեսրոպ Մակյանը կարգի հրավիրելով ներկաներին՝ նշեց, որ կարգը խախտելու դեպքում նիստը կքննվի դռնփակ կարգով: