Փաշինյանի շռայլ բարեկամների «մտրակն ու բլիթը»
«2019-ին Հայաստանը, նախատեսվածից բացի, լրացուցիչ ֆինանսական աջակցություն ևս կստանա», օրերս Երևանում Հայաստանի արտգործնախարար Զոհրապ Մնացականյանի հետ համատեղ ասուլիսում հայտարարեց Եվրամիության ընդարձակման հարցերով հանձնակատար Յոհաննես Հանը, ով ընտրություններից հետո առաջին անգամ է Հայաստանում։ «Հայաստանում անցկացվեցին լավ, յուրահատուկ ընտրություններ նոր պատմության ընթացքում, միջազգային հանրությունը դրանք գնահատեց ազատ և արդար։ Այս ամենի հիման վրա պետք է նայել ապագային տնտեսական զարգացման առումով, որն անհրաժեշտ է, որպեսզի հասարակությունը դառնա ավելի ուժեղ և ժողովրդավար։ Այս առումով առանձնացրել ենք համագործակցության մի շարք ոլորտներ, ինչպես գյուղատնտեսությունը, դատական բարեփոխումները, կրթությունը։ Ինչպես նաև, մենք հատուկ բյուջետային տող ունենք, որը նվիրված է իրավունքի ու ժողովրդավարության բնագավառներում հատուկ ձեռքբերումներին: Դա լրացուցիչ ֆինանսական աջակցություն կլինի Հայաստանին։ Հիմա հունվարն է, վաղաժամ է, բայց հանդգնում եմ հայտարարել, որ լրացուցիչ աջակցություն կլինի՝ խրախուսելու անցյալ տարվա զարգացումները», - նշեց Հանը։ Եվրամիության ընդարձակման հարցերով հանձնակատարը հավաստիացրեց, որ 2021-2027թթ. բյուջեն պլանավորելիս նախատեսել են Եվրամիության հարևաններին ավելի մեծ աջակցություն ցուցաբերել, ինչից ապագայում Հայաստանը ևս կօգտվի։ Մինչ այդ ՀՀ իշխանությունների հետ բանակցություններում քննարկվել է նաև Հայաստանում եվրոպական ընկերությունների ներդրումային համաժողով անցկացնելու հնարավորությունը․ - «Հայաստանում տրամադրությունը շատ դրական է, որը զգացվում է նաև Հայաստանի սահմաններից դուրս: Ներդրումային միջավայրի վրա ևս ազդում է։ Մարդիկ այսօր, ավելի քան երբևէ, հետաքրքրված են, որպեսզի գան Հայաստան օգտագործեն առկա հնարավորությունները»։ Եվրամիությունը նորություն չունի Հայաստանի հետ վիզաների ազատականացման մասին: Հանը նշեց, որ Եվրոպայում սպասվում են խորհրդարանական ընտրություններ, ինչից հետո միայն վիզաների մասին կարող են ավելի ակտիվ բանակցություններ վարվել։ Ահա, եվրոպացի բարձրաստիճան պաշտոնյան համարձակ արձանագրում է անում՝ «հանդգնում» է փաստել, որ լրացուցիչ օժանդակություն կլինի Հայաստանին: Հաջորդ կարևոր ուղերձն այն է, որ ԵՄ-ն մեծ կարևորություն է տալիս ԵՄ-Հայաստան հարաբերություններին և պատրաստ է ուժեղացնել աջակցությունը քաղաքացիների կյանքի բարելավման համար։ Այսպես, Հայաստան այցելած Եվրոպական հարևանության և ընդլայնման քաղաքականության հարցերով ԵՄ հանձնակատար Յոհաննես Հանը Հայաստանում քննարկեց ԵՄ-ի կողմից բարեփոխումներին աջակցությունը և տարածաշրջանում երկրի հետագա ներգրավման անհրաժեշտությունը։ Ի դեպ, հանձնակատար Հանը եվրոպացի առաջին պաշտոնյաներից էր, որ շնորհավորեց Նիկոլ Փաշինյանին՝ դեկտեմբերյան արտահերթ խորհրդարանական ընտրություններում տարած հաղթանակի կապակցությամբ: Փաշինյանն ու Հանը մեկ անգամ արդեն հանդիպել են՝ անցած աշնանը Նյու Յորքում՝ ՄԱԿ-ի Գլխավոր վեհաժողովի շրջանակներում: Փաշինյանը եվրոպացի հանձնակատարին վստահեցրել էր, որ իր կառավարությունը հետամուտ է ժողովրդավարության ամրապնդմանն ու ընդգծել՝ այս հարցում Երևանն ակնկալում է ԵՄ համընդգրկուն աջակցությունը: Հանը բանակցություններից հետո Թվիթերում գրել էր. - «Շատ լավ հանդիպում ունեցա Հայաստանի վարչապետի հետ: Ես վստահեցրի Փաշինյանին, որ Եվրամիությունը կշարունակի աջակցել նրա բարեփոխումներին ու Հայաստանին: Տեսնենք՝ ինչպես կարող ենք մեր օգնության փաթեթն ավելի նպատակային օգտագործել՝ առաջնային բարեփոխումների համար»: Ի դեպ, Հանի այցը համընկավ Եվրամիության Արևելյան գործընկերության ծրագրի տասնամյակին, որով Բրյուսելն աջակցություն է տրամադրում նախկին Խորհրդային Միության վեց պետություններին, այդ թվում՝ Հայաստանին՝ ժողովրդավարության, մարդու իրավունքների պաշտպանության ու տնտեսության ազատականացման ուղղությամբ կատարված բարեփոխումների համար: Այսինքն, Հանն անդրադարձել է նաև այդ ծրագրին ու երկկողմ հարաբերությունների ամրապնդմանը: Այս այցով, անկասկած, Հանը կարևորել է Հայաստանի հավատարմությունը Արևելյան գործընկերությանը, որի տասնամյակն է այս տարի, և այդ համատեքստում ընդգծել առավել ընդարձակ տարածաշրջանային համագործակցության անհրաժեշտությունը: Բոլորի համար պարզ է, որ ԵՄ-ի «մտքում» էլ տարածաշրջանային կտրվածքով՝ ԼՂ խնդիրն է, թեև առանձին ծրագրերով ՀՀ-ԵՄ համագործակցության շրջանակներում աջակցությունը կշարունակվի տրամադրվել: Հետևաբար, հարցը հետևյալն է՝ ԵՄ-ի «բոնուսներն» ինչի՞ դիմաց են: Թամար Բագրատունի
Հետևեք մեզ Viber-ում
