«Հեղափոխությունը մի լավ կողմ էլ ուներ». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է. «Հեղափոխությունը մի լավ կողմ էլ ուներ. այն մերկացրեց համատարած տգիտությունն ու անգրագիտությունը՝ ստիպելով մեզ առերեսվել այդ տխուր իրողության հետ: Հեղափոխությունից առաջ դա նկատելի չէր, քանի որ բոլորը տարված էին ռեժիմը կազմաքանդելու անզուսպ գաղափարով: Անցնենք բուն թեմային։ Մեր հարևան Ադրբեջանը ԻՎԿ-ի անդամ է (Իսլամական կոնֆերանս կազմակերպություն): Սա կրոնաքաղաքական խոշոր կազմակերպություն է, որը ստեղծվել է 1969 թ. ու միավորում է բոլոր մուսուլմանական պետություններին: Եգիպտոսից, Սաուդյան Արաբիայից, Պակիստանից, Ինդոնեզիայից և մյուս խոշորագույն մուսուլմանական պետություններից զատ այդ կազմակերպության անդամներն են նաև Գաբոնը, Բրունեյը, Գամբիան, Բուրկինա-Ֆասոն ու բազմաթիվ նմանատիպ աֆրիկյան ու ասիական պետություններ: Եվ այսպես 1991թ.-ից սկսած Ադրբեջանը մշտապես առիթը բաց չի թողնում կազմակերպության գագաթնաժողվների ժամանակ Ղարաբաղյան հարցում ինչպես ԻՎԿ-ի, այնպես էլ անդամ երկրների աջակցությունը ստանալու համար: Ինչու չէ նաև՝ Գաբոնի, Բրունեյի ու Գամբիայի: Նշենք նաև, որ այս ուղղությամբ ադրբեջանական դիվանագիտությունը կարողացել է որոշակի հաջողությունների հասնել, իսկ Հայաստանը բնականաբար չի կարողացել որևէ կանխարգելող գործողությունների դիմել, քանի որ կազմակերպության անդամ չէ: Հիմա ինչու այս լեկցիան կարդացի: Ինչ-որ կիսագրագետ մարդիկ ծաղրի առարկա են դարձրել այն փաստը, որ ԱԺ նախագահ Արարատ Միրզոյանը Գանայի ներկայացուցչից ակնկալել է հավասարակշիռ մոտեցում Ղարաբաղյան հիմնախնդրի վերաբերյալ: Մենք պետք է հստակ պատկերացում կազմենք, որ Ղարաբաղյան կոնֆլիկտը միայն հայ-ադրբեջանական բախում չէ: Դա ամբողջ միջազգային հանրության խնդիրն է և Հայաստանը պարտավոր է օգտագործել ցանկացած ամբիոն այդ հարցը արծարծելու ու հայանպաստ դիրքորոշում ակնկալելու ուղղությամբ: Նույնը անում է Ադրբեջանը, իսկ մենք ավելի ակտիվ պետք է շարժվենք՝ ՄԱԿ-ի անդամ բոլոր պետություններից ակնկալելով հավասարակշիռ ու սթափ մոտեցում: Բայց դե ինչից ենք խոսում, անիմաստ ա բան ասելը, միևնույնն է, ձերը վերարկուի ու ախռանիկի մասին աշխարհացունց վերլուծություններ գրելն ա, տղաներ ու աղջիկներ ջան»: