Օգտվել են Կարենի մենակությունից

«Իրազեկ քաղաքացիների միավորում» հասարակական կազմակերպության գլխավոր փորձագետ,սպանված Կարեն Վարդանյանը երկար ժամանակ աշխատել է «Ազգային ժողովրդավարների դաշինք» կուսակցության նախագահ Արշակ Սադոյանի հետ, եղել է նրա օգնականը, կուսակցության երիտասարդական կառույցի ղեկավարը։ Սադոյանը մեզ հետ զրույցում ասաց, որ վերջին ժամանակները քիչ էին շփվում Կարեն Վարդանյանի հետ, քանի որ կուսակցական աշխատանքները քիչ են .«Նա կուսակցության երիտասարդական խմբի ղեկավարն էր, խելացի, նույնիսկ կասեմ գիտունիկ, ես անձամբ խորհրդակցում էի նրա հետ, լսում խորհուրդները»,- ասաց Արշակ Սադոյանը։ Հետաքրքրվեցինք, թե երբեւէ դժգոհե՞լ է ինչ-որ բանից, կամ խոսել խնդիրների մասին, սակայն Սադոյանը բացասական պատասխան տվեց։ Նա ասաց, որ Կարեն Վարդանյանը միայնակ էր ապրում.«Անցած տարի մայրը մահացավ հիվանդությունից, ինքը միայնակ էր մնում ու երեւի օգտվել են իր մենակությունից, փողերը գողացել ու սպանել»։ Հիշեցնենք, որ երեկ հայտնաբերվել է «Իրազեկ քաղաքացիների միավորում» ՀԿ գլխավոր փորձագետ Կարեն Վարդանյանը, ում արդեն 10 օրից ավելի փնտրում էին ծանոթներն ու բարեկամները: Նախնական տեղեկություններով Կարեն Վարդանյանին 22-ամյա Գևորգ Զոհրաբյանը՝ 43-ամյա տաքսիստ Արթուր Միհրանյանի հետ միասին, սպանել էին փորձագետին՝ մոտը եղած գումարը վերցնելու նպատակով: Ըստ տեղեկությունների` սպանությունը կապված է Վարդանյանի բնակարանի առքուվաճառքից ստացված գումարի հետ: Ըստ լուրերի՝ Կարեն Վարդանյանը 300 000 դրամի կալանք ուներ իր անունով, որպեսզի այն չտարածվի տան վրա, հարեւանը համոզել էր տունն իր անունով գրանցել:Եղել է այդպես,հետո տունը վաճառել են ու գումարը հանձնել Կարենին, որից հետո տեղի է ունեցել սպանությունն ու գումարի հափշտակումը։Նրանք բութ գործիքներով Կարեն Վարդանյանին բազմաթիվ հարվածներ են հասցրել, այնուհետեւ դին թաքցրել Գևորգ Զոհրաբյանին պատկանող Երևանի Սիսակյան փողոցի 22 շենքի հարակից ավտոտնակում: Կարեն Վարդանյանը ավարտել է ԵՊՀ Աստվածաբանության ֆակուլտետի բակալավրիատը, 2003թ.՝ մագիստրատուրան։ 2006թ.՝Քաղաքական դասընթացների երևանյան դպրոցը, 2009թ.՝ ՀՀ պետական կառավարման ակադեմիան, 2012թ.՝ ՀՀ պետական կառավարման ակադեմիայի ասպիրանտուրան։ 2015 թվականից աշխատում էր «Իրազեկ քաղաքացիների միավորում» ՀԿ փորձագետ, «Շողակն» ԲՀԿ խորհրդատու և «Սարգսյան» իրավաբանական խմբի գլխավոր խորհրդատու: 2005 թվականից զբաղվում էր հասարակական և քաղաքական գործունեությամբ։ Կարեն Վարդանյանի սպանության լուրը ցնցել է բոլորին, Ֆեյսբուքում նրա մասին բացառապես դրական հուշեր են։ Ուշագրավ էր ՍԴՀԿ Հայաստանի վարչության ատենապետ Նարեկ Գալստյանի գրառումը.«Մի ամիս առաջ Կարենն եկավ գրասենյակ, բավական երկար զրուցեցինք: Ասացի, որ բավական հետաքրքիր գաղափարներ ունի, մտածում էինք ինչպես անել, որպեսզի ավելի ակտիվանա: Ասաց, որ ուզում է քաղաքապետի ընտրություններին մասնակցել, ես էլ կատակով ասացի, թե եթե երկրորդ ձայնը ես պետք է տամ, հարց չկա, պատրաստ եմ... Ծիծաղեցինք, պայմանավորվեցինք հանդիպել... Ո՞վ կմտածեր, որ էս վիժվածքները նման բանի են ընդունակ: Ո՞վ կմտածեր, որ Կարենի վրա ինչ-որ մեկն իրեն թույլ կտա ձեռք բարձրացնել: Մարդկային դաժանությունը չափ ու սահման չունի...»։ Անի Սահակյան