Արմավիրի հացի գործարանում գողության պահին կինը սրտի կաթվածից է ընկել ու մահացել (տեսանյութ)
Հունվարի 11-ին՝ ժամը 17:30 սահմաններում, ոստիկանության Արմավիրի բաժնում օպերատիվ կառավարման կենտրոնից ահազանգ էր ստացվել, որ հացի գործարանում գողություն է կատարվել, պահակին խփել են: Խոսքը Արմավիրի չգործող, նախկին հացի գործարանի մասին էր, եւ օպերատիվ խումբը դեպքի վայր է շտապել: ՀՀ ոստիկանությունից հայտնում են, որ արտադրամասերից մեկում իրավապահները հայտնաբերել են պահակի` Գեղեցիկ Գաբրիելյանի դին։ Տպավորությունն այնպիսին էր, ասես նրան հրել էին, կամ ինքն էր արտադրամասի աստիճանահարթակից ընկել: Վնասված է եղել գլուխը, աջ ձեռքին քերծվածքներ են եղել: Աղջիկն է նրան գտել այդ վիճակում: Առարկաներ, հետքեր, գործի համար նշանակություն ունեցող այլ ապացույցներ հայտնաբերելու, նաեւ դեպքի հանգամանքները պարզելու նպատակով ոստիկաններն արտադրամասի տարածքում համապատասխան ուսումնասիրություններ են արել: Դիակն ուղարկվել է փորձաքննության: Դեպքի վայրում հայտնաբերվել է դանակ, կտրված պղնձե մալուխներ, որոնք չէին հասցրել հափշտակել: Զարմանալիորեն` տարածքում տուժողի ու նրա աղջկա ոտնահետքերից բացի, այլ ոտնահետքեր չեն նկատվել: Արտադրամասի դուռը վնասված չէր: Նրանք նշված տարածք մտնելու իրավունք չունեին: Դուռը մշտապես կողպված էր: Ավելի ուշ ստացվել է նաեւ դատաբժշկի նախնական եզրակացությունը, համաձայն որի` Գաբրիելյանը մահացել էր ոչ թե ինչ-որ մեկի խփելու հետեւանքով, այլ սրտի կաթվածից: Հետագա միջոցառումներով քրեական հետախույզները պարզել են, որ նշված գործարանի պահակ Գեղեցիկ Գաբրիելյանը դստեր` Հրածին Գաբրիելյանի հետ, գողություն կատարելու նպատակով մտել են գործարանի արտադրամաս, որտեղ Գեղեցիկ Գաբրիելյանը սրտի կանգ ունենալու հետեւանքով մոտ 5 մետր բարձրությունից ընկել եւ մահացել է: Պահակը որոշել էր իրեն վստահված տարածքից գողություն անել ու մահացել էր այն արտադրամասում, որտեղ մտնելու իրավունք չուներ: Այս փաստը կոծկելու համար էր Հրածին Գաբրիելյանը հորինել գողերի գործարան մտնելու ու մորը խփելու պատմությունը: Կատարվածի հանգամանքները լրիվ, բազմակողմանի եւ օբյեկտիվ քննելու ուղղությամբ միջոցառումները շարունակվում են: Փաստի առթիվ Արմավիրի քննչական վարչությունում նախապատրաստվում են նյութեր:
Հետևեք մեզ Viber-ում
