«Մի մտեք մեր ու «Իմ քայլը» դաշինքի կռվի մեջ». Մարուքյանը՝ ԲՀԿ-ին

11:14 - 15/հունվարի/2019

«Մեր ելույթներն ուղղված են այն խմբակցությանը, որը չունի թեկնածու եւ իրենց ձայներից է կախված, թե ով է ընտրվելու: Մեր ելույթները ԲՀԿ-ին ուղղված չեն, որովհետեւ նրանք ունեն թեկնածու եւ քվեարկելու են իրենց թեկնածուի օգտին»,- ԱԺ-ում ընդդիմադիր փոխխոսնակի ընտրության հարցի քննարկման ժամանակ նշեց «Լուսավոր Հայաստան» խմբակցության ղեկավար Էդմոն Մարուքյանը: «Մենք քաղաքական իմաստով կռիվ ենք տալիս, որ մեր թեկնածուին ներկայացնենք, պաշտպանենք, որ նա ընտրվի, ու այդ կռվի մեջ, հարգելի ԲՀԿ, դուք մտնում ու կռիվ եք տալիս: Եթ դրա կարիքը լինի ես ընդհանրապես չեմ հապաղի հետ գնալ եւ սկսել ինչ-որ բաներ ասել: Օրինակ, մեր նախարարին չեն փողոցում հեռացրել պաշտոնից ու հայտարարել հակահեղափոխական: Ձեր կուսակցությունից են արել, բայց մենք դա չենք ասում: Ինչքան ասեք, մենք պետք է ասենք:Կռիվ ունեք, ձեր կռիվը տարեք, որովհետեւ ձեր ձայներն էլ պետք է ըստ էության, այնտեղից գա»,-հայտարարեց Մարուքյանը՝ կոչ անելով չմտնել իրենց ու «Իմ քայլը» դաշինքի կռվի մեջ:

Այս իրավիճակում կա երեք ճանապարհ «Իմ քայլի» համար. ընտրել Մանե Թանդիլյանին, ընտրել Վահե Էնֆիաջյանին եւ թողնել ազատ, ով ում ուզում է, թող ընտրի,հայտարարեց նա և հավելեց, որ քանի որ «Իմ քայլը» որոշել է, որ քվեարկելու է ԲՀԿ թեկնածուի օգտին, իրենք «Իմ քայլը» դաշինքի կողմից առաջադրված ԱԺ փոխխոսնակների քվեարկության ժամանակ իրենց պատգամավորներին ազատ կթողնեն քվեարկության ժամանակ: «Եթե մեր տարբերակը չհաղթահարի այն արգելքները, որոնք այստեղ ստեղծված են, մենք կարող է չունենանք ԱԺ նախագահի ընդդիմադիր տեղակալ»,-իր խոսքն ամփոփեց ԼՂՀ ղեկավարը: