Չի բացառվում՝ Քոչարյանի պաշտպանները երրորդ հայցադիմումն ուղարկեն ՄԻԵԴ

Վաղը Երևան քաղաքի ընդհանուր իրավասության դատարանի Շենգավիթ նստավայրում կշարունակվի ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց ընտրված կալանավորումն այլընտրանքային խափանման միջոց գրավով փոխարինելու վերաբերյալ դատաքննությունը։ Araratnews.am-ը Ռոբերտ Քոչարյանի փաստաբան Արամ Օրբելյանից հետաքրքրվեց՝  որքա՞ն գրավ է պատրաստ վճարել երկրորդ նախագահը խափանման միջոցի փոփոխության համար: «Այդ հարցին չեմ կարող պատասխանել, քանի որ չեմ քննարկել այն Ռոբերտ Քոչարյանի հետ: Մենք կարծում ենք՝ գրավը կիրառելի է, ի՞նչ ծավալով՝  դատարանն է որոշում»,- ասաց  փաստաբանը: Արամ Օրբելյանը տեղեկացրեց՝ երեկ Մարդու իրավունքների եվրոպական դատարան  երկրորդ հայցադիմումն են ուղարկել: Երրորդն էլ համարյա պատրաստ է, սակայն կուղարկե՞ն, թե՞ ոչ՝  պարզ կլինի վաղվա դատական նիստից: Ի դեպ, Մարտի մեկի գործով քննիչը նախորդ դատական նիստում չէր բացառել, որ  դատարանին բացարկի միջնորդություն կներկայացնի: Սակայն միջնորդություն ներկայացնելը ձգձգեց: «Մեկ այլ՝ Մարտի մեկի գործով, որը մեզ հետ կապ չուներ, դատավորն ինքնաբացարկ էր հայտնել: Քննիչն ինքնաբացարկի միջնորդությունն էր ուզում, քանի որ չէր ստացել: Քննիչը կարծում էր՝ դրա հիման վրա կարող է այս գործով էլ դատավորին բացարկ ներկայացնել, չնայած մենք կարծում ենք՝ դրա անհրաժեշտությունը չկա»,- ավարտեց իր խոսքը Ռոբերտ Քոչարյանի պաշտպան Արամ Օրբելյանը: